امریکہ کے صدر جو بائیڈن نے چین کے ہم منصب شی جن پنگ سے 90 منٹ تک ٹیلی فون پر گفتگو کی ہے۔ دونوں ملکوں کے سربراہانِ مملکت کے درمیان ہونے والا یہ سات ماہ میں پہلا رابطہ ہے۔
وائٹ ہاؤس سے جاری بیان کے مطابق دونوں رہنماؤں نے بات چیت کے دوران اس بات پر اتفاق کیا کہ مختلف معاملات پر براہِ راست رابطہ رکھا جائے گا۔
وائٹ ہاؤس کے مطابق صدر جو بائیڈن نے گفتگو میں واضح کیا کہ اس گفتگو کا مقصد چین اور امریکہ میں جاری مسابقتی عمل کو ذمہ دارانہ انداز میں آگے بڑھانے کی امریکہ کی کوششوں کا حصہ ہے۔
صدر بائیڈن نے امریکہ کی خطے اور دنیا میں پائیدار امن، استحکام اورخوش حالی کے لیے کوششوں کی بات بھی کی۔
🇺🇸 @POTUS Biden spoke with President Xi Jinping of the People’s Republic of China. The two leaders had a broad, strategic discussion in which they discussed areas where our interests converge, and areas where our interests, values, & perspectives diverge.https://t.co/w9c1AdmVhM
— U.S. Embassy Vienna (@usembvienna) September 10, 2021
وائٹ ہاؤس کے مطابق دونوں صدور نے امریکہ اور چین کی اقوام کی مسابقت کو کسی تنازع میں تبدیل نہ ہونے کی ذمہ داری پر بھی تبادلۂ خیال کیا۔
چین کی سرکاری اطلاعات کی کونسل کے جاری بیان کے مطابق جمعے کی صبح امریکہ کے صدر جو بائیڈن کی چین کے صدر شی جن پنگ کو ٹیلی فون کال موصول ہوئی۔
بیان کے مطابق دونوں صدور نے چین اور امریکہ کے تعلقات سمیت مختلف امور پر تفصیلی گفتگو کی۔ اس دوران صدر شی کا کہنا تھا کہ امریکہ اور چین اپنے تعلقات کو دوبارہ جس قدر جلد درست سمت میں لائیں گے اس سے نہ صرف دونوں ممالک کی اقوام بلکہ دنیا کو بھی فائدہ ہوگا۔
Chinese President Xi Jinping Speaks with US President Joseph Biden on the Phone.🔗https://t.co/XFYxugfSr1 pic.twitter.com/fmnMEUtR3A
— Hua Chunying 华春莹 (@SpokespersonCHN) September 10, 2021
بیان کے مطابق چینی صدر نے کہا کہ باہمی احترام کی بنیاد پر ایک دوسرے کے خدشات اور اختلافات کو درست انداز میں دور کرنے کی ضرورت ہے جس کے لیے دونوں ممالک کے متعلقہ اداروں کو رابطے اور گفت و شنید جاری رکھنے چاہیئں۔
صدر شی نے کرونا وبا سے نمٹنے، ماحولیاتی تبدیلیوں کے اثرات اور دنیا میں کساد بازاری سے مقابلہ کرنے سمیت دیگر عالمی معاملات پر تعاون اور رابطے رکھنے کی ضرورت پر زور دیا۔
خیال رہے کہ اس سے قبل دونوں ملکوں کے سربراہانِ مملکت کے درمیان رواں برس فروری میں رابطہ ہوا تھا۔
صدر جو بائیڈن نے شی جن پنگ سے گفتگو کے دوران چین کے غیر منصفانہ تجارتی معاملات، ہانگ کانگ میں جمہوریت کے حامیوں کے خلاف کریک ڈاؤن، ایغور مسلم اقلیت کے ساتھ سلوک اور انسانی حقوق کی پامالی پر تحفظات کا اظہار کیا تھا۔
اُس وقت شی جن پنگ نے تسلیم کیا تھا کہ دونوں ملکوں کے درمیان اختلافات موجود ہیں جنہیں حل کرنے کی ضرورت ہے۔ چینی صدر نے مجموعی طور پر تعاون جاری رکھنے پر زور دیا تھا۔
Your browser doesn’t support HTML5
امریکہ کے سابق صدر ڈونلڈ ٹرمپ کے دورِ حکومت میں واشنگٹن اور بیجنگ کے درمیان تعلقات کشیدہ رہے تھے اور دونوں ممالک نے ایک دوسرے کی مصنوعات پر بھاری ٹیکس عائد کیے تھے۔
امریکہ اور چین کے صدور کا رابطہ ایک ایسے وقت میں ہوا ہے جب گزشتہ ماہ افغانستان سے امریکہ نے اپنی افواج کا انخلا مکمل کیا ہے۔
امریکہ کے انخلا کے دوران کابل پر طالبان قابض ہوئے تھے اور گزشتہ ہفتے انہوں نے اپنی عبوری حکومت کا اعلان کیا ہے۔
امریکہ کے انخلا کے ساتھ ہی چین نے طالبان سے تیزی سے تعلقات قائم کیے ہیں۔