بھارت کے کپتان روہت شرما کی قیادت میں ٹیم کو ایک کے بعد ایک شکست کا سامنا کرنا پڑ رہا ہے۔ ٹی ٹوئنٹی ورلڈ کپ کے سیمی فائنل میں جس ٹیم کو انگلینڈ نے 10 وکٹ سے مات دی تھی، اسے اب بنگلہ دیش کے ہاتھوں ون ڈے میں ایک وکٹ سے شکست کا سامنا کرنا پڑا ہے۔
بنگلہ دیش میں میرپور میں کھیلے گئے میچ میں بنگلہ دیشی کپتان لٹن داس نے ٹاس جیت کر فیلڈنگ کا فیصلہ کیا تو بھارت کی ٹیم ایک بڑا اسکور کرنے کے لیے میدان میں اتری لیکن ایسا نہ ہو سکا اور سوائے نائب کپتان کے ایل راہل کے کوئی بھی بلے باز 50 کا ہندسہ عبور نہ کرسکا۔
راہل جو اس میچ میں بطور وکٹ کیپر کھیلے اور جنہیں بیٹنگ کے لیے پانچویں نمبر پر بھیجا گیا، انہوں نے 70 گیندوں پر پانچ چوکوں اور چار چھکوں کی مدد سے 73 رنز اسکور کیے۔
TOYAM Sports Limited ODI Series: Bangladesh vs India: 1st ODIBangladesh won by 1 wicket#BCB | #Cricket | #BANvIND pic.twitter.com/TWbnJVEA8V
— Bangladesh Cricket (@BCBtigers) December 4, 2022
دوسری طرف سے نہ روہت شرما رنز کر سکے اور نہ ہی وراٹ کوہلی کا بیٹ چلا۔ بھارت کی پوری ٹیم 42ویں اوور کی دوسری گیند پر 186 رنز بناکر آؤٹ ہوگئی۔
بنگلہ دیش کی جانب سے شکیب الحسن نے 36رنز کے عوض پانچ کھلاڑیوں کو آؤٹ کیا جب کہ عبادت حسین نے 47 رنز دے کر چار وکٹیں حاصل کیں۔
Shakib Al Hasan with a spectacular 5 wicket haul in the 1st ODI against India. #BCB | #Cricket | #BANvIND pic.twitter.com/graouZ8BAY
— Bangladesh Cricket (@BCBtigers) December 4, 2022
جواب میں میزبان ٹیم کا آغاز بھی اچھا نہ تھا اور دوسری ہی گیند پر نجم الحسن شنٹو بغیر کوئی رن بنائے آؤٹ ہوگئے۔
ایسے میں کپتان لٹن داس نے ایک اینڈ سنبھالے رکھا اور یکے بعد دیگرے وکٹیں گرنے کے باوجود 63 گیندوں پر 41 رنز کی اننگز کھیلی۔
ایک ایسی اننگز میں جہاں نہ شکیب الحسن چلے، نہ مشفق الرحیم اور نہ ہی محموداللہ، مہدی حسن نے ذمہ داری سے کھیلتے ہوئے رنز بنانے کے سلسلے کو جاری رکھا اور مستفیض الرحمان کے ساتھ آخری وکٹ پر 51 رنز جوڑے۔
India are all out for 186!What a bowling performance from Bangladesh 👏Follow the #BANvIND action 👉 https://t.co/Ymfh2IDe14 pic.twitter.com/J5QytJLtw1
— ICC (@ICC) December 4, 2022
جس وقت یہ دونوں وکٹ پر اکٹھا ہوئے تھے، بنگلہ دیش کا اسکور نو وکٹ پر 136 رنز تھا لیکن بھارت کے بالرز کی مایوس کن پرفارمنس اور روہت شرما کی کپتانی نے بنگلہ دیش کے بیٹرز کو آزادانہ رنز بنانے کا موقع دیا۔
بنگلہ دیشی بلے بازوں نے ہدف 46ویں اوور میں حاصل کرکے سیریز میں ایک صفر کی برتری بھی حاصل کر لی اور بھارت کو ایک اور شکست سے دو چار کیا ہے۔
A sensational tenth-wicket partnership has given Bangladesh a win to start off the series 👏 #BANvIND pic.twitter.com/ot9w4r9Tx3
— ICC (@ICC) December 4, 2022
بھارت کی جانب سے محمد سراج تین وکٹوں کے ساتھ سب سے کامیاب بالر رہے۔ کلدیپ سین اور واشنگٹن سندرنے بھی دو دو وکٹیں حاصل کیں لیکن بنگلہ دیش کی آخری وکٹ کوئی بالر حاصل نہ کرسکا۔
یہ بنگلہ دیش کی بھارت کے خلاف مجموعی طور پر 37 ون ڈے میچز میں چھٹی اور جون 2015 کے بعد پہلی کامیابی ہے۔
جون 2015 میں بھی بھارت کی ٹیم میں روہت شرما، شیکھر دھاون، وراٹ کوہلی شامل تھے۔