افغانستان کے صوبے بغلان میں نامعلوم افراد نے بارودی سرنگوں کا خاتمہ کرنے والی بین الاقوامی غیر سرکاری تنظیم کے 10 رضا کاروں کو فائرنگ کر کے ہلاک کر دیا۔
افغان وزارتِ داخلہ نے بدھ کو تصدیق کی ہے کہ بارودی سرنگوں (آئی ای ڈی) کو ناکارہ بنانے کا کام کرنے والی غیر سرکاری تنظیم ’ہالو ٹرسٹ‘ کے رضا کاروں کو شمالی افغانستان کے صوبے بغلان میں قائم کیمپ میں نقاب پوش افراد نے نشانہ بنایا۔
صوبہ بغلان کی پولیس کے ترجمان نے وائس آف امریکہ کو بتایا کہ نشانہ بننے والے تمام افراد افغان شہری ہیں۔ یہ افراد غیر سرکاری تنظیم کے ساتھ مل کر بارودی سرنگوں کو ناکارہ بنانے کا کام کرتے تھے۔
پولیس ترجمان کا کہنا تھا کہ مسلح افراد نے ان رضا کاروں کو ہلاک کرنے سے قبل ایک کمرے میں جمع کیا اور پھر ان پر گولیاں برسانا شروع کر دیں۔
خبر رساں ادارے ’اے ایف پی‘ کے مطابق افغان حکام رضاکاروں کے قتل کے لیے افغان طالبان کو ذمہ دار قرار دے رہے ہیں اور اس حملے کو بھی طالبان کے حالیہ پر تشدد کارروائیوں کی مہم کا حصہ بتایا جا رہا ہے۔
افغان وزارتِ داخلہ کے ترجمان طارق آریان نے صحافیوں سے گفتگو میں کہا کہ طالبان بارودی سرنگوں کا خاتمہ کرنے والی ایجنسی کے ایک کمپاؤنڈ میں داخل ہوئے اور وہاں موجود افراد کو قتل کرنا شروع کر دیا۔
تېره شپه شاوخوا ۱۰ بجې ترهګر طالبان د ماین پاکانو یوه کمپ ته دننه شوي او پر ماین پاکانو یې ډزې کړې، چې د لومړني راپور له مخې ۱۰ تنه شهیدان او ۱۴ نور ټپيان شوي دي. یاده پېښه د بغلان مرکزي ولسوالۍ په شیخ جلال سیمه کې رامنځته شوې ده. pic.twitter.com/72LXDEHStA
— Ministry of Interior Affairs- Afghanistan (@moiafghanistan) June 9, 2021
بغلان کے گورنر کے ترجمان نے ’اے ایف پی‘ کو بتایا کہ حملہ آوروں نے چہروں پر نقاب لگائے ہوئے تھے۔
دوسری جانب طالبان کے ترجمان ذبیح المجاہد نے اس حملے میں طالبان کے ملوث ہونے کی تردید کی ہے۔
سوشل میڈیا پر ایک بیان میں ذبیح اللہ مجاہد کا کہنا تھا کہ بغلان میں بارودی سرنگوں کی صفائی کرنے والے رضا کاروں پر حملے سے مجاہدین کا کوئی تعلق نہیں ہے۔
#ClarificationAttack on deminers in Markazi Baghlan, martyrdom of 10 & injuries to multiple has no relation with IEA Mujahidin.We condemn attacks on the defenseless & view it as brutality. We have normal relations with NGOs, our Mujahidin will never carry out such brutal acts. https://t.co/6CUbjWJyHL
— Zabihullah (..ذبـــــیح الله م ) (@Zabehulah_M33) June 9, 2021
انہوں نے مزید کہا کہ طالبان نہتے افراد پر حملے کی مذمت کرتے ہیں جب کہ اس کو ظلم سمجھتے ہیں۔
ان کا دعویٰ تھا کہ طالبان کے غیر سرکاری تنظیموں کے ساتھ عمومی تعلقات ہیں۔ جب کہ طالبان مجاہدین کبھی ایسے ظالمانہ حملے نہیں کریں گے۔
حملے کا نشانہ بننے والی غیر سرکاری تنظیم ’ہالو ٹرسٹ‘ نے بھی مذمت کرتے ہوئے کہا ہے کہ بغلان کے اس علاقے میں 100 سے زائد مقامی افراد بارودی سرنگوں کو ناکارہ بنانے کے عمل میں شامل رہے ہیں۔
— The HALO Trust (@TheHALOTrust) June 9, 2021
سوشل میڈیا پر ایک بیان میں مزید کہا گیا تھا کہ مسلح افراد کا ایک گروہ کیمپ میں داخل ہوا اور اس نے لوگوں پر فائرنگ شروع کر دی۔ اس وقت کیمپ میں 110 مقامی رضا کار موجود تھے۔ یہ رضا کار قریبی علاقوں میں بارودی سرنگوں کو ناکارہ بنانے کا کام کر رہے تھے۔
اقوامِ متحدہ نے بھی اس واقعے کی مکمل تحقیقات کا مطالبہ کیا ہے تاکہ اس واقعے کے ذمہ دار افراد کو انصاف کے کٹہرے میں لایا جا سکے۔
Read statement from @RamizAlakbarov strongly condemning yesterday%27s heinous attack on @TheHALOTrust in Baghlan, northern Afghanistan.Heartfelt condolences to the families of the deceased and wishes for a speedy and full recovery to the injured.https://t.co/XnDnl59JKI pic.twitter.com/U9t6hSR04R
— OCHA Afghanistan (@OCHAAfg) June 9, 2021
اقوامِ متحدہ کے افغان دارالحکومت کابل میں انسانی حقوق کے معاون رمیز اکبروف کا ایک بیان میں کہنا تھا کہ یہ ایک گھناؤنا عمل ہے کہ اس تنظیم کو نشانہ بنایا جائے جو بارودی سرنگوں اور دیگر دھماکہ خیز مواد کو ناکارہ بنانے کے عمل میں مصروف ہو اور جو کمزور لوگوں کی زندگی کو بہتر بنانے کا کام انجام دے رہی ہو۔
افغان صدر اشرف غنی نے بھی حملے کی مذمت کی ہے۔
اشرف غنی کا کہنا تھا کہ طالبان صرف بارودی سرنگیں ناکارہ بنانے والوں کو نشانہ نہیں بنا رہے بلکہ وہ امدادی اداروں، تعلیمی اداروں، مساجد، اساتذہ، طلبہ سب کو نشانہ بنا رہے ہیں۔ یہ سب انسانیت کے خلاف جرم ہے۔
جمهوررئیس غني پر ماین پاکانو برید د غندلو پر مهال وویل: وسله وال طالبان نه یوازې ماین پاکان، بلکې خیریه موسسې، ښوونځي، جوماتونه، ښوونکي او محصلین نښه ګرځوي، چې د خلکو د کرکې راپورته کېدو لامل ګرځي او دا ټول بشري جنایتونه دي چې په هېڅ منطق نشي توجیه کېدای. https://t.co/tYrd2D4U0j
— ارگ (@ARG_AFG) June 9, 2021
خیال رہے کہ ’ہالو ٹرسٹ‘ نے افغانستان میں بارودی سرنگیں ناکارہ بنانے کا کام 1988 میں شروع کیا تھا۔ سویت یونین نے ایک دہائی تک قبضے کے بعد 1989 میں افغانستان سے انخلا مکمل کیا تھا۔
یہ غیر سرکاری تنظیم صرف افغانستان میں ہی امور انجام نہیں دے رہی بلکہ دنیا کے دیگر خطوں جن میں افریقہ، یورپ، مشرقِ وسطیٰ اور جنوبی امریکہ کے ممالک شامل ہیں، میں جنگ کے بعد بارودی سرنگوں اور دیگر دھماکہ خیز خطرناک مواد کو ناکارہ بنانے کا کام سر انجام دیتی ہے۔
ہالو ٹرسٹ کے مطابق افغانستان میں اس کے 2600 رضا کار ہیں جنہوں نے ملک میں 80 فی صد ان بارودی سرنگوں کو ناکارہ بنا دیا ہے جو کہ ریکارڈ پر موجود ہیں۔
بارودی سرنگوں کو ناکارہ بنانے والی غیر سرکاری تنظیم کے رضاکاروں کو ایسے وقت میں قتل کیا گیا ہے جب امریکہ کے صدر جو بائیڈن نے افغانستان میں دو دہائیوں سے جاری جنگ کے خاتمے کے لیے بین الاقوامی افواج کا انخلا 11 ستمبر تک مکمل کرنے کی پالیسی پر عمل پیرا ہیں۔ فوجی انخلا کا عمل یکم مئی سے شروع ہوا تھا۔ البتہ اس کے ساتھ ساتھ طالبان کے حملوں میں بھی اضافہ ہوا ہے اور یکم مئی کے بعد سے اب تک وہ 14 اضلاع پر مکمل طور پر قبضہ کر چکے ہیں۔
افغانستان میں حالیہ دنوں میں پر تشدد کارروائیوں میں فریقین کے ساتھ ساتھ درجنوں عام شہری بھی نشانہ بنتے رہے ہیں۔
ایک روز قبل منگل کو ہی امریکہ کی فوج نے اعلان کیا تھا کہ اس نے واپسی کا 50 فی صد سے زائد عمل مکمل کر لیا ہے۔
Update on withdrawal of U.S. forces from Afghanistan June 7, 2021https://t.co/z5ouDgFSTE
— U.S. Central Command (@CENTCOM) June 8, 2021
افغانستان سے غیر ملکی افواج کا انخلا فروری 2020 کے اس معاہدے کے تحت ہو رہا ہے جو امریکہ اور طالبان کے درمیان ہوا تھا جس کے تحت طالبان نے یقین دہانی کرائی تھی کہ افغان سرزمین کسی بھی ملک کے خلاف استعمال نہیں ہو گی۔
امریکہ کے سابق صدر ڈونلڈ ٹرمپ کی انتظامیہ نے مئی تک فوجی انخلا مکمل کرنے کی یقین دہانی کرائی تھی البتہ بعد ازاں جو بائیڈن کے امریکہ کے صدر بننے کے بعد یہ انخلا 11 ستمبر 2021 تک مکمل کرنے کا اعلان کیا گیا۔
دوسری جانب افغان حکومت اور طالبان میں افغانستان کا مسئلہ مذاکرات سے حل کرنے کے لیے قطر کے دارالحکومت دوحہ میں امن مذاکرات کا آغاز ہوا۔ البتہ ان مذاکرات میں کوئی بڑی پیش رفت نہیں ہو سکی ہے۔