عالمی فضائی سفر پر گامزن پاکستانی گلوکار اور اداکار فخر عالم کو روس کے مشرقی شہر کے ایک ائیر پورٹ پر ویزے کی معیاد ختم ہونے کی وجہ سے حراست میں لیے جانے کی اطلاعات کے بعد پاکستان کے دفتر خارجہ کا کہنا ہے کہ روس میں پاکستان کے سفیر، روسی حکام سے رابطے میں ہیں ان کا معاملہ جلد حل کر لیا جائے گا۔
فخر عالم ایک پرائیویٹ جہاز پر عالمی سفر پر گامزن ہیں اور انہیں پیر کو جاپان سے روس کے مشرقی شہر یوزنا سخالنسک کے ائیر پورٹ پر ان کی پروز لینڈ ہونے کے بعد حراست میں لے لیا گیا ۔
پاکستان کے دفتر خارجہ کا کہنا ہے کہ وہ ماسکو میں پاکستان کے سفیر روس کے حکام سے رابطے میں ہیں اور وہ فخر عالم کے ویزے کے معاملے کو سلجھانے کی کوشش کررہے ہیں۔
Our Amb in Moscow has spoken to Fakher e Alam. He is also in touch with local authorities. Problem will hopefully be resolved soon. #MissionParwaaz
— Dr Mohammad Faisal (@DrMFaisal) October 29, 2018
قبل ازیں فخر کے دوست اور اداکار فیصل قریشی نے سماجی میڈیا پر فخر کے حوالے سے بتایا ہے کہ انہیں یوزنا سخالنسک کے ائیر پورٹ پر حراست میں لے لیا گیا ہے کیونکہ ان کے ویزے کی معیاد روس پہنچے سے دو گھنٹے پہلے ختم ہو گئی تھی اور اب انہیں کہا جارہا ہے کہ وہ واپس جاپان چلے جائیں۔
فخر کا مزید کہنا تھا کہ وہ جاپان واپس نہیں جا سکتے کیونکہ ان کے پاس جاپان واپس جانے کا ویزا نہیں ہے۔
انہوں نے پاکستان حکومت سے اپیل کی کہ وہ روس کی حکومت سے رابطہ کرکے انہیں اپنے سفر جاری رکھنے کی اجازت دیے دیں۔
انہوں نے کہاکہ وہ اس صورت حال میں دنیا کے گرد اپنے سفر کو ختم نہیں کرنا چاہتے ہیں ۔
Bro please tweet on my behalf. I am being detained at Yuzhno-Sakhalinsk airport because my visa expired 2 hours and date changed. They are forcing me to turn back to Japan. I cannot go to Japan because I had single entry visa. I appeal to Pak govt to request Russian govt to allow
— Faysal Quraishi (@faysalquraishi) October 29, 2018
اگرچہ روس کے حکام کا فخر عالم کے حوالے سے کئے جانے والے دعویٰ پر تاحال روس کے حکام کا کوئی بیان سامنے نہیں آیا ہے تاہم پاکستان کے دفتر خارجہ کے ترجمان محمد فیصل نےٹوئٹر بیان میں کہا ہے کہ ماسکو میں تعینات پاکستان کے سفیر روسی حکام سے رابطے میں ہیں اور انہوں نے توقع کی ہے کہ فخر عالم کو درپیش مسئلہ سلجھا لیا جائے گا۔
وائس آف امریکہ سے گفتگو میں انہوں نےکہا کہ پاکستانی سفیر کی فخر عالم سے فون پربات ہوئی ہے اور وہ خیریت سے ہیں ۔
واضح رہے کہ 10 اکتوبر کو فخر عالم نے ' مشن ۔ پرواز ' کےنام سے اپنے عالمی فضائی سفر کا اغاز امریکہ سےکیا تھا اور 28 دنوں پر محیط سفر کا اختتام بھی امریکی ریاست فلوریڈا میں کرنے کا پروگرام بنا رکھا ہے۔