امریکہ اب نئی بلندیوں تک جائے گا: ڈونلڈ ٹرمپ
ری پبلکن پارٹی کے صدارتی امیدوار ڈونلڈ ٹرمپ کا کہنا ہے کہ امریکہ کے عوام نے آج تاریخ رقم کی ہے ۔ اب یہ ملک نئی بلندیوں تک جائے گا۔
ریاست فلوریڈا میں اپنے انتخابی ہیڈ کوارٹر میں حامیوں سے خطاب میں ڈونلڈ ٹرمپ نے کہا ہے کہ وہ اس وقت تک آرام سے نہیں بیٹھیں گے جب تک امریکہ کو ایک محفوظ اور خوش حال ملک بنانے کا عہد پورا نہ کریں۔
انہوں نے مزید کہا کہ وہ امریکہ کے عوام کے حق کے لیے ہر روز مقابلہ کریں گے۔ ڈونلڈ ٹرمپ نے ایک بار پھر کہا کہ امریکہ کے سنہری دور کا آغاز ہونے والا ہے۔
ان کا کہنا تھا کہ میں نے کوئی جنگ شروع نہیں کی بلکہ میں نے جنگیں ختم کی ہیں۔ الیکشن مہم کے حوالے سے ان کا کہنا تھا کہ انتخابی مہم کے دوران 900 ریلیاں منقعد کیں۔
انہوں نے امریکی عوام پر زور دیا کہ یہ وقت اتحاد کا ہے۔ گزشتہ برسوں میں جو تقسیم تھی اس کو پیچھے چھوڑنا ہوگا۔
ترکیہ کے صدر کی ٹرمپ کو مبارک باد
ترکیہ کے صدر رجب طیب اردوان نے ری پبلکن پارٹی کے امیدوار ڈونلڈ ٹرمپ کو مبارک باد دی ہے۔
سوشل میڈیا پر ایک بیان میں رجب طیب اردوان کا کہنا تھا کہ ’’میں اپنے دوست ڈونلڈ ٹرمپ کو دوبارہ امریکہ کا صدر دوبارہ بننے پر مبارک باد پیش کرتا ہوں۔‘‘
انہوں نے امید ظاہر کے نئے دور میں امریکہ اور ترکیہ کے تعلقات مضبوط ہوں گے۔
کاملا ہیرس کی منی سوٹا میں کامیابی، الیکٹورل ووٹ 224 ہو گئے
ڈیموکریٹک پارٹی کی صدارتی امیدوار کاملا ہیرس کو منی سوٹا میں کامیابی ملی ہے جس کے بعد ان کے الیکٹورل ووٹوں کی تعداد 224 ہو گئی ہے۔
واضح رہے کہ منی سوٹا کے الیکٹورل ووٹوں کی تعداد 10 تھی جس کاملا ہیرس کو ملے ہیں۔
واضح رہے کہ ری پبلکن پارٹی کے صدارتی امیدوار ڈونلڈ ٹرمپ 267 الیکٹورل ووٹ حاصل کر چکے ہیں۔
امریکہ میں صدر بننے کے لیے 538 الیکٹورل ووٹوں میں سے کم از کم 270 ووٹ حاصل کرنا ضروری ہے۔
ابھی ریاست مشی گن، وسکونسن، نیواڈا، ایریزونا اور الاسکا کے نتائج آنا باقی ہیں۔
برطانوی وزیرِ اعظم کا ڈونلڈ ٹرمپ کے لیے پیغام
برطانیہ کے وزیرِ اعظم کیئر اسٹارمر نے ڈونلڈ ٹرمپ کو مبارک باد دی ہے۔
سوشل میڈیا پر جاری ایک بیان میں کیئر اسٹارمر کا کہنا تھا کہ نو منتخب صدر ڈونلڈ ٹرمپ کو تاریخی کامیابی پر مبارک باد۔
انہوں نے کہا کہ آنے والے برسوں میں برطانیہ اور امریکہ آزادی، جمہوریت اور دیگر امور میں مشترکہ اقدار کے دفاع کے لیے کندھے سے کندھا ملا کر کھڑے ہوں گے۔
اسرائیلی وزیرِ اعظم کی ٹرمپ کو مبارک باد
اسرائیل کے وزیرِ اعظم بن یامین نیتن یاہو نے سوشل میڈیا پر ایک بیان میں کہا ہے کہ وہ ڈونلڈ ٹرمپ کو تاریخی واپسی پر مبارک باد پیش کرتے ہیں۔
انہوں نے مزید کہا کہ آپ کی وائٹ ہاؤس میں واپسی امریکہ کے لیے نئی شروعات ہیں۔
ان کا کہنا تھا کہ یہ ایک بڑی کامیابی ہے۔