براہِ راست ڈونلڈ ٹرمپ فتح کے قریب؛ الیکشن ہیڈ کوارٹر میں حامیوں سے خطاب

بھارت کے وزیرِ اعظم نریندر مودی نے امریکہ کی ری پبلکن پارٹی کے صدارتی امیدوار ڈونلڈ ٹرمپ کو مبارک باد دی ہے۔

سوشل میڈیا پر ایک بیان میں مودی کا کہنا تھا کہ وہ اپنے دوست ڈونلڈ ٹرمپ کو الیکشن میں تاریخی کامیابی پر مبارک باد دینا چاہتے ہیں۔

انہوں نے ٹرمپ کی صدارت کے گزشتہ دور کا ذکر کرتے ہوئے کہا کہ وہ مستقبل میں امریکہ اور بھارت کے درمیان تعلقات کی مضبوطی کے امید رکھتے ہیں۔

انہوں نے ٹرمپ کو مشترکہ طور پر کام کرنے کی امید کا بھی اظہار کیا۔

پاکستان کے وزیرِ اعظم شہباز شریف کی ڈونلڈ ٹرمپ کو مبارک باد دی ہے۔

سوشل میڈیا پلیٹ فارم ایکس پر ایک بیان میں شہباز شریف نے کہا کہ نو منتخب صدر ڈونلڈ ٹرمپ کو تاریخی کامیابی پر مبارک باد۔

انہوں نے مزید کہا کہ وہ امریکہ میں آنے والی نئی انتظامیہ کے ہمراہ کام کرنے کے منتظر ہیں۔

واضح رہے کہ پاکستان میں سوشل میڈیا پلیٹ فارم ایکس پر پابندی ہے۔

امریکی صدارتی انتخاب میں کانٹے کے مقابلے والی ریاست پینسلوینیا میں جیت کے لیے ری پبلکن صدارتی امیدوار ڈونلڈ ٹرمپ الیکشن جیتنے کے قریب پہنچ گئے ہیں اور وہ اب تک مطلوبہ الیکٹورل ووٹس سے صرف تین ووٹوں کی دوری پر ہیں۔

صدارتی الیکشن کی جیت کے لیے جن سات ریاستوں کو کانٹے کے مقابلے والی ریاستیں قرار دیا جا رہا تھا، ان میں سے تین اہم ریاستوں پینسلوینیا، جارجیا اور نارتھ کیرولائنا میں ٹرمپ نے کامیابی حاصل کی ہے۔

ٹرمپ اب تک 267 الیکٹورل ووٹس حاصل کر چکے ہیں جب کہ ان کے مدِ مقابل ڈیموکریٹک صدارتی امیدوار کاملا ہیرس نے 214 الیکٹورل ووٹس حاصل کیے ہیں۔ صدارتی الیکشن جیتنے کے لیے 538 میں سے 270 الیکٹورل ووٹس درکار ہوتے ہیں۔

کاملا کو انتخابی مقابلے میں واپس آنے کے لیے تمام ریاستوں میں جیتنا ہو گا جن میں سوئنگ اسٹیٹس مشی گن، وسکونسن، نیواڈا اور ایریزونا شامل ہیں۔

امریکہ کے ایوانِ بالا یعنی سینیٹ میں بھی ری پبلکن پارٹی نے اکثریت حاصل کر لی ہے۔ تاہم اب تک یہ معلوم نہیں ہو سکا ہے کہ ایوانِ نمائندگان میں کس جماعت کا کنٹرول ہو گا۔

ٹرمپ نے بدھ کی علی الصباح فلوریڈا میں اپنے انتخابی ہیڈکوارٹر میں حامیوں سے خطاب کے دوران الیکشن میں فتح کا دعویٰ کیا ہے۔

ٹرمپ نے کہا کہ ' یہ وہ لمحہ ہے جو کسی نے پہلے کبھی نہیں دیکھا ہو گا اور مجھے یقین ہے کہ یہ تاریخ کی سب سے عظیم سیاسی تحریک تھی۔

انہوں نے اس عزم کا اظہار کیا کہ وہ سرحدوں کے معاملات اور ملک کے ہر مسئلے کو ٹھیک کریں گے۔ ٹرمپ نے مزید کہا کہ وہ امریکہ کو مضبوط، محفوظ اور خوش حال بنانے کے لیے کام کریں گے۔

دوسری جانب کاملا ہیرس کی انتخابی مہم نے واشنگٹن میں اپنے حامیوں کو کہا ہے کہ کاملا رات میں حامیوں سے خطاب نہیں کریں گے اور ان کا خطاب بدھ کو کسی وقت ہو گا۔

ری پبلکن پارٹی کے صدارتی امیدوار ڈونلڈ ٹرمپ کا کہنا ہے کہ امریکہ کے عوام نے آج تاریخ رقم کی ہے ۔ اب یہ ملک نئی بلندیوں تک جائے گا۔

ریاست فلوریڈا میں اپنے انتخابی ہیڈ کوارٹر میں حامیوں سے خطاب میں ڈونلڈ ٹرمپ نے کہا ہے کہ وہ اس وقت تک آرام سے نہیں بیٹھیں گے جب تک امریکہ کو ایک محفوظ اور خوش حال ملک بنانے کا عہد پورا نہ کریں۔

انہوں نے مزید کہا کہ وہ امریکہ کے عوام کے حق کے لیے ہر روز مقابلہ کریں گے۔ ڈونلڈ ٹرمپ نے ایک بار پھر کہا کہ امریکہ کے سنہری دور کا آغاز ہونے والا ہے۔

ان کا کہنا تھا کہ میں نے کوئی جنگ شروع نہیں کی بلکہ میں نے جنگیں ختم کی ہیں۔ الیکشن مہم کے حوالے سے ان کا کہنا تھا کہ انتخابی مہم کے دوران 900 ریلیاں منقعد کیں۔

انہوں نے امریکی عوام پر زور دیا کہ یہ وقت اتحاد کا ہے۔ گزشتہ برسوں میں جو تقسیم تھی اس کو پیچھے چھوڑنا ہوگا۔