ایران پر مشتبہ اسرائیلی حملہ، اصفہان شہر میں دھماکوں کے بعد ایئر ڈیفنس سسٹم فعال

ایرانی حکام نے خبر رساں ادارے 'رائٹرز' کو بتایا ہے کہ ایرانی سرزمین پر جمعے کو کوئی میزائل حملہ نہیں ہوا ہے۔

رائٹرز کے مطابق ایرانی حکام کا کہنا ہے کہ جمعے کی علی الصباح اصفہان شہر میں ایئر ڈیفنس سسٹم فعال کرنے کے نتیجے میں دھماکے ہوئے تھے۔

ایران کے سرکاری میڈیا نے کہا ہے کہ ملک کے وسطی شہر اصفہان میں جمعے کو تین ڈرون مار گرائے ہیں۔

خبر رساں ادارے 'رائٹرز' کے مطابق ایرانی میڈیا نے رپورٹ کیا ہے کہ اصفہان شہر پر ڈرون طیاروں کی پروازوں کے بعد ایئر ڈیفنس سسٹم حرکت میں آیا اور تینوں ڈرونز کو تباہ کر دیا ہے۔

ایران کے سرکاری میڈیا کے مطابق سینئر کمانڈر سیاووش مہندس کا کہنا ہے کہ ایئر ڈیفنس سسٹم نے مشکوک چیزوں کو نشانہ بنایا ہے۔

ایران نے اپنی سرزمین پر کسی میزائل حملے کی تردید کی ہے تاہم امریکی نشریاتی اداروں نے امریکی حکام کا حوالہ دیتے ہوئے کہا کہ ہے اسرائیل نے جمعے کو ایران پر حملہ کیا ہے۔

نیویارک ٹائمز نے گمنام اسرائیلی عہدیداروں کے حوالے سے ایران پر حملے کا دعویٰ کیا ہے۔

خبر رساں ادارے 'رائٹرز' کے مطابق اسرائیلی حکومت اور فوج نے اب تک ایران میں کسی بھی کارروائی سے متعلق کوئی بیان نہیں دیا ہے۔

ایرانی حکام نے خبر رساں ادارے 'رائٹرز' کو بتایا ہے کہ اسرائیل کے خلاف کوئی کارروائی کرنے کا منصوبہ نہیں ہے۔

ایرانی حکام کے مطابق غیر ملکی ذرائع کی جانب سے سامنے آنے والی اطلاعات کی تصدیق نہیں ہوئی ہے۔ ایران پر کوئی بیرونی حملہ نہیں ہوا ہے۔