سپریم کورٹ: ذوالفقار علی بھٹو کی سزا کے خلاف صدارتی ریفرینس پر سماعت منگل تک ملتوی
سپریم کورٹ آف پاکستان نے سابق وزیرِ اعظم ذوالفقار علی بھٹو کی سزائے موت کے خلاف دائر صدارتی ریفرنس کی سماعت منگل تک ملتوی کردی ہے۔
پیر کو ہونے والی سماعت میں عدالتی معاونین خالد جاوید اور صلاح الدین نے اپنے دلائل مکمل کیے۔ چیف جسٹس قاضی فائز عیسٰی کی سربراہی میں نو رکنی لارجر بینچ نے ریفرینس کی سماعت کی۔
عدالتی معاون خالد جاوید خان نے کہا کہ اگر عدلیہ آزاد ہوتی تو بھٹو کو پھانسی نہ ہوتی۔ بھٹو اپیل پر سپریم کورٹ میں جس عدالتی بنچ نے کیس سنا اس میں ایڈہاک ججز بھی شامل تھے۔
عدالتی معاون خالد جاوید خان کا کہا تھا کہ سپریم کورٹ میں ذوالفقار علی بھٹو کیس کا ٹرائل دوبارہ نہیں کھولا جاسکتا۔ سپریم کورٹ اس حد تک ضرور قرار دے سکتی ہے کہ بھٹو کیس غلط طریقے سے چلایا گیا۔
عدالتی معاون بیرسٹر صلاح الدین نے اپنے دلائل میں کہا کہ عدالتیں پہلے فیصلوں کو اکثر بدلتی رہتی ہیں۔ سوال یہ ہے کہ عدالت کیا آرٹیکل 186 تین کے دائرہ اختیارمیں یہ کر سکتی ہے؟
بیرسٹرصلاح الدین کا بھارتی سپریم کورٹ کے فیصلے کا حوالہ دیتے ہوئے کہا کہ عدالتی فیصلے نہیں مگر پرنسپل آف لا کی دوبارہ تعریف ہو سکتی ہے۔ 2013 میں ججوں کی تعیناتی کیس میں بھی سپریم کورٹ پاکستان کا فیصلہ موجود ہے۔
چیف جسٹس نے منگل کی سماعت کے لیے حکم نامہ لکھواتے ہوئے کہا کہ کل ہم اس معاملے کو فوج داری پہلو سے سنیں گے۔
الیکشن کمیشن کا سنی اتحاد کونسل کی مخصوص نشستوں کی درخواست پر اوپن سماعت کا فیصلہ
پاکستان تحریکِ انصاف کے حمایت یافتہ آزاد امیدواروں کے سنی اتحاد کونسل میں شامل ہونے کے بعد جماعت کو اسمبلیوں میں مخصوص نشستیں الاٹ کی جائیں یا نہیں؟ الیکشن کمیشن نے اس معاملے پر اوپن سماعت کا فیصلہ کیا ہے۔
سنی اتحاد کونسل کی مخصوص نشستوں کی الاٹمنٹ کی درخواست پر الیکشن کمیشن کا پانچ رکنی بینچ منگل کو سماعت کرے گا۔
الیکشن کمیشن نے قومی اسمبلی کی 23 مخصوص نشستوں پر نوٹی فکیشن تاحال روکے ہوئے ہیں۔
دہشت گردی اور اسٹریٹ کرائم فوری چیلنجز ہیں: نو منتخب وزیرِ اعلیٰ سندھ
تیسری بار سندھ کے وزیرِ اعلیٰ منتخب ہونے والے مراد علی شاہ نے کہا ہے تمام سیاسی جماعتوں کے ارکان سے مثبت کردار ادا کرنے کی توقع ہے۔
وزیرِ اعلیٰ منتخب ہونے کے بعد سندھ اسمبلی میں خطاب کرتے ہوئے انہوں نے کہا کہ پاکستان اور صوبۂ سندھ بہت مشکلات میں ہے۔ دہشت گردی دوبارہ بڑھ رہی ہے۔ بدقسمتی سے اسٹریٹ کرائمز بھی بڑھے ہیں۔ کچے کے علاقے میں آپریشن پر دوبارہ توجہ دینی ہے۔ یہ ہماری حکومت کے فوری چیلنجز ہے۔
ان کا کہنا تھا کہ ہمیں بھی الیکشن پر بہت سے اعتراضات ہیں لیکن ہم قانونی راستہ اختیار کریں گے۔ چند سییٹیں ہم سے لی گئی ہیں اس کے لیے قانونی جنگ لڑیں گے۔
نو منتخب وزیرِ اعلیٰ نے کہا کہ چیئرمین بلاول بھٹو کی ہدایت ہے کہ دو چار سیٹوں کے لیے ملک کی سالمیت کو خطرے میں نہیں ڈالیں گے۔
مراد علی شاہ مسلسل تیسری مرتبہ سندھ کے وزیرِ اعلیٰ منتخب
پیپلزپارٹی کے رہنما سید مراد علی شاہ مسلسل تیسری مرتبہ سندھ کے وزیرِ اعلیٰ منتخب ہوگئے ہیں۔
مراد علی شاہ کو 112 ووٹ ملے جب کہ ان کے مقابلے میں ایم کیو ایم کے علی خورشیدی 36 ووٹ حاصل کر سکے۔
تحریک انصاف کے حمایت یافتہ اراکین اور جماعتِ اسلامی کے رکنِ اسمبلی نے ووٹنگ میں حصہ نہیں لیا۔
مریم نواز نے پنجاب کی وزارتِ اعلیٰ کا حلف اٹھا لیا
پنجاب کی نو منتخب وزیرِ اعلیٰ مریم نواز نے عہدے کا حلف اٹھا لیا ہے۔
گورنر ہاؤس پنجاب میں منعقدہ حلف برداری تقریب میں گورنر بلیغ الرحمٰن نے مریم نواز سے وزیرِ اعلیٰ کے عہدے کا حلف لیا۔
تقریب میں سابق وزیرِ اعظم نواز شریف، شہباز شریف اور ان کے خاندان کے دیگر افراد موجود تھے۔
واضح رہے کہ مریم نواز پاکستان کی تاریخ میں کسی بھی صوبے کی پہلی خاتون وزیرِ اعلیٰ ہیں۔