کسی سیاسی جماعت میں شامل ہونے والے آزاد اُمیدوار پارٹی تبدیل نہیں کر سکتے: اسپیکر قومی اسمبلی

لاہور ہائی کورٹ نے عدلیہ مخالف تقاریر اور تحریکِ انصاف کا لاہور میں جلسہ رکوانے کے لیے دائر درخواست سماعت کے لیے مقرر کر لی ہے۔

جسٹس فاروق حیدر درخواست گزار مرزا واحد رفیق نامی شہری کی درخواست پر سماعت کریں گے جب کہ درخواست میں صوبائی حکومت سمیت دیگر کو فریق بنایا گیا ہے۔

درخواست کے متن کے مطابق پی ٹی آئی کی قیادت سیکیورٹی خدشات کے تحت عدالت سے رجوع کرتی رہی ہے اور وہ اب انتظامیہ کی اجازت کے بغیر لاہور میں جلسہ کرنے جا رہی ہے۔

درخواست گزار نے مؤقف اختیار کیا ہے کہ پی ٹی آئی کے آٹھ ستمبر کے جلسے میں حکومت اور عدلیہ کے خلاف نامناسب زبان استعمال کی گئی تھی اور خدشہ ہے کہ لاہور کے جلسے میں بھی پارٹی قیادت کی جانب سے عدلیہ مخالف تقاریر کی جا سکتی ہیں۔

درخواست میں عدالت سے استدعا کی گئی ہے کہ وہ پی ٹی آئی کو انتظامیہ کی منظوری کے بغیر جلسہ کرنے سے روکنے اور پارٹی رہنماؤں کو عدلیہ مخالف تقاریر سے روکنے کا حکم دے۔

سندھ کے علاقے عمر کوٹ میں توہینِ مذہب کا ملزم مبینہ پولیس مقابلے میں مارا گیا ہے جب کہ عینی شاہدین کا کہنا ہے کہ ملزم پولیس کی تحویل میں تھا۔

مقامی پولیس نے دعویٰ کیا ہے کہ سوشل میڈیا پر مبینہ توہین مذہب کے مقدمے میں نامزد سینیئر میڈیکل آفیسر ڈاکٹر شاہنواز کنبھر کو پولیس گرفتار کرنے گئی تو ملزم نے اہلکاروں پر فائرنگ شروع کر دی جب کہ جوابی فائرنگ میں ملزم مارا گیا ہے۔

عمر کوٹ میں بدھ کو توہینِ مذہب کے معاملے پر مشتعل مظاہرین نے شہر میں ہنگامہ آرائی کے دوران پولیس موبائل کو نذرِآتش کردیا تھا۔ شہر میں حالات دوسرے روز بھی کشیدہ ہیں اور پولیس حکام کا کہنا ہے کہ واقعے کی مزید تفتیش کی جارہی ہے۔

سندھ کے علاقے بے نظیر آباد میں بھائی نے غیرت کے نام پر دو سگی بہنوں کو بجلی کے کرنٹ لگا کر قتل کر دیا ہے۔

تھانہ بی سیکشن کی حدود مہاجر کالونی میں ملزم کامران علی نے اپنی دو بہنوں رضیہ اور علشباہ کو مبینہ طور پر غیر کے نام پر قتل کیا جن کی لاشیں پوسٹ مارٹم کےلیے پیپلز میڈیکل اسپتال منتقل کردی ہیں۔

پولیس کے مطابق ملزم کامران کو حراست میں لے کر واقعے کی مزید تفصیلات اکھٹی کی جارہی ہیں۔

حکومتِ پنجاب نے میڈیکل اینڈ ڈینٹل کالج کے داخلہ ٹیسٹ MDCAT کے لیے صوبے کے 12 شہروں میں دفعہ 144 نافذ کر دی ہے۔

لاہور، گوجرانولہ، سیالکوٹ، فیصل آباد، ملتان، بہاولپور، ڈیرہ غازی خان، ساہیوال، راولپنڈی، سرگودھا، گجرات اور رحیم یار خان میں 22 ستمبر کو داخلہ ٹیسٹ ہوں گے اور اس روز مذکورہ شہروں میں امتحانی مراکز سے 100 گز کے فاصلے تک غیر متعلقہ افراد کی نقل و حرکت پر پابندی ہو گی۔

صوبائی حکومت کی ہدایت پر محکمۂ داخلہ کی جانب سے جاری نوٹی فکیشن کے مطابق امیدواروں اور سپروائزری عملے کے علاوہ کوئی شخص امتحانی مراکز میں داخل نہیں ہو سکے گا جب کہ امتحانی مراکز اور اردگرد ہر قسم کا ہتھیار، موبائل فون، ڈیجیٹل ڈائری، کتابیں اور گائیڈز لے جانے پر پابندی ہو گی۔

نوٹی فکیشن کے مطابق امتحانی مراکز اور ارد گِرد کسی قسم کے احتجاج یا مظاہرے کی اجازت نہیں ہوگی۔کسی شخص کو امتحانی عمل میں رکاوٹ بننے یا غیر منصفانہ ذرائع کے استعمال کی اجازت نہیں ہوگی۔