امریکہ کا پاکستان کے انتخابی عمل میں مبینہ بدعنوانی کے الزامات کی تحقیقات کا مطالبہ
امریکہ نے پاکستان کے انتخابی عمل میں مبینہ بد عنوانی کے الزامات کی مکمل تحقیقات کرانے کا مطالبہ کیا ہے۔
امریکی محکمۂ خارجہ کے ترجمان میتھیو ملر نے کہا ہے کہ پاکستانی انتخابات میں مبینہ بدعنوانی سے متعلق بعض تحفظات کا اظہار کھل کر اور نجی سطح پر بھی کیا اور ہم نے یورپی یونین، برطانیہ اور دیگر ممالک کی طرف سے ظاہر کیے گئے اظہارِ تشویش کی تائید بھی کی ہے۔
میتھیو ملر نے پیر کے روز ہفتہ وار بریفنگ کے دوران کہا کہ انتخابی عمل میں بعض بے قاعدگیاں، جن کا ہم نے مشاہدہ کیا، ان کے بارے میں ہم نے پاکستانی حکومت کو آگاہ کیا ہے کہ لوگوں کی رائے کا احترام کیا جائے۔
انہوں نے صحافیوں کے سوال کے جواب میں کہا "ہم اس بات کو یقینی بنانا چاہتے ہیں کہ مداخلت اور دھوکہ دہی کے جو الزامات سامنے آ رہے ہیں ، پاکستان کے قانون کے تحت ان کی مکمل تحقیقات کی جائیں۔ ہم آنے والے دنوں میں اس عمل پر نظر رکھیں گے۔"
ایک سوال کے جواب میں ترجمان میتھیو ملر نے کہا، "میں صرف اس بات کا اعادہ کرتا ہوں کہ دھوکہ دہی کے الزامات کی مکمل چھان بین کی ضرورت ہے ۔ یہ واضح طور پر ایک مسابقتی انتخابات تھے جس میں لوگوں نے انتخاب کرنے کا حق استعمال کیا۔
پاکستانی عوام کی مرضی کا احترام اور شفاف انتخابی عمل یقینی بنانے کی ضرورت ہے، وائٹ ہاؤس
وائٹ ہاؤس نے کہا ہے کہ صدر بائیڈن پاکستان میں انتخابات سے بالکل باخبر ہیں کہ گزشتہ ہفتے لاکھوں پاکستانی ووٹ ڈالنے نکلے، جن میں پاکستانی خواتین، مذہبی اور نسلی اقلیتی گروپوں کے ارکان اور نوجوان ووٹرز کی ریکارڈ تعداد شامل تھی۔
وائٹ ہاؤس کی ترجمان کیرین یاں پیئر نے منگل کو صحافیوں سے بات کرتے ہوئے مزید کہا،" یقینی طور پر ہم پاکستانی عوام کو گزشتہ ہفتے کے انتخابات میں حصہ لینے پر مبارک باد پیش کرتے ہیں، بشمول انتخابی عملے، سول سوسائٹی کے اراکین، اور صحافیوں اور انتخابی مبصرین جنہوں نے پاکستان کے جمہوری اور انتخابی اداروں کی حفاظت کی ہے۔"
انہوں نے مزید کہا ،"ہمیں ہم خیال جمہوری نظام کے ساتھ کھڑے ہونے پر فخر ہے۔ ہم مسلسل پاکستانی حکومت اور پاکستانی سیاسی جماعتوں کو عوامی اور نجی دونوں سطح پر واضح طور پر بتاتے رہتے ہیں کہ پاکستانی عوام کی مرضی کا احترام کرنے اور شفاف انتخابی عمل کو یقینی بنانے کی ضرورت ہے۔ یہ واضح طور پر اہم ہے۔"
علی امین گنڈاپور خیبر پختونخوا کے وزیر اعلیٰ نامزد
پاکستان تحریکِ انصاف (پی ٹی آئی) کے بانی عمران خان نے خیبر پختونخوا کے وزیرِ اعلیٰ کے لیے علی امین گنڈا پور کے نام کی منظوری دے دی ہے۔
علی امین گنڈاپور 2018 کے انتخابات میں کامیابی حاصل کرنے کے بعد عمران خان کی حکومت میں وزیر امور کشمیر اور گلگت بلتستان رہے اور اس دوران انہوں نے گلگت بلتستان کو صوبہ بنانے کے امور پر کام کیا-
وہ 2022 سے 2023 تک پارٹی کے صوبائی جنرل سیکرٹری رہے اور 7 ماہ سے پارٹی صدر ہیں۔ مشکلات اور ریاستی اداروں کے مخالفت کے باوجود انہوں نے پارٹی کو مشکل ترین حالات میں منظم کیا اور 2024 کے انتخابات میں خیبر پختونخوا کی سطح پر حمایت یافتہ آزاد امیدواروں کی کامیابی میں اہم کردار ادا کیا۔
لگ بھگ 1978 میں خیبر پختونخوا کے جنوبی ضلع ڈیرہ اسماعیل خان کے تحصیل کلاچی کے ایک بااثر زمیندار گھرانے میں پیدا ہوئے والے علی امین گنڈاپور زمانہ طالب علمی سے آزاد طبیعت کے مالک رہے ہیں۔
ڈیرہ اسماعیل خان کے ایک معیاری تعلیمی ادارے سے میٹرک کے بعد انہوں نے لاہور کے نیشنل کالج آف آرٹس سے انہوں نے فیشن ڈیزائننگ اور ٹیکسٹائل ڈیرزاننگ میں دو سالہ ڈپلومہ لیا اور پھر گومل یونیورسٹی سے گریجویشن کی۔
جس وقت علی امین گنڈاپور گریجویشن کر رہے تھے اس وقت سابق وزیر اعظم عمران خان نے پاکستان تحریک انصاف کے قیام کا اعلان کیا اور علی امین گنڈاپور نے باقاعدہ طور پر اس میں شمولیت اختیار کی اور 2008 انتخابات سے پہلے عدلیہ کے آزادی کے لیے مختلف سیاسی جماعتوں کے احتجاجی مظاہروں کے دوران وہ عمران خان کے بہت قریب آ گئے۔
مسلم لیگ نون نے وزیراعظم کے لیے شہباز شریف اور وزیراعلی پنجاب کے لیے مریم نواز کو نامزد کر دیا
پاکستان مسلم لیگ نون کی ترجمان مریم اورنگ زیب نے سماجی رابطے کی ویب سائٹ ایکس پر اپنی ایک پوسٹ میں کہا ہے کہ نواز شریف نے شہباز شریف کو وزیراعظم پاکستان جب کہ مریم نواز کو وزیراعلٰ پنجاب کے عہدے کے لیے نامزد کر دیا ہے۔
انہوں نے مزید کہا کہ نوازشریف نے عوام، سیاسی تعاون فراہم کرنے والی پارٹیوں اوران کے قائدین کا شکریہ ادا کیا ہے۔
ترجمان کا یہ بھی کہنا تھا کہ مسلم لیگ (ن) کی قیادت کے ان فیصلوں کے نتیجے میں پاکستان معاشی خطرات پر قابو پانے میں مدد ملے گی اور عوام مہنگائی سے نجات پائیں گے۔
پیپلزپارٹی کی جانب سے حمایت کے اعلان پر شکرگزار ہیں: شہباز شریف