'ہمارے نمبر پورے نہیں ہوتے تو اتحاد کے بجائے اپوزیشن میں بیٹھیں گے'

پنجاب پولیس نے دفعہ 144 کی خلاف ورزی پر تحریک انصاف کے پندرہ کارکنوں کو حراست میں لے لیا ہے۔

وائس آف امریکہ کے نمائندے ضیاء الرحمٰن کے مطابق تحریک انصاف کے کارکنان اتوار کو انتخابات میں مبینہ دھاندلی کے خلاف زمان پارک، لبرٹی مارکیٹ اور باغبان پورہ سمیت لاہور کے مختلف علاقوں میں اکٹھا ہونا شروع ہوئے تھے کہ وہاں موجود پولیس اہلکاروں نے پی ٹی آئی کارکنوں کو حراست میں لے لیا۔

پولیس کا کہنا ہے کہ صوبے بھر میں دفعہ 144 نافذ ہے جس کے تحت کسی کو بھی اجتماع کی اجازت نہیں ہے۔ پولیس کے مطابق قانون کی خلاف ورزی کرنے والوں کو حراست میں لیا ہے۔

پولیس نے احتجاج کے پیشِ نظر لاہور کی مختلف شاہراہوں پر نفری، قیدیوں کو لے جانے والی گاڑیاں اور واٹر کینن تیار رکھی ہوئی ہیں۔

واضح رہے کہ پی ٹی آئی نے مبینہ دھاندلی کے خلاف اتوار کو مختلف شہروں میں پُر امن احتجاج کی کال دی تھی جسے بعد ازاں ملتوی کردیا گیا تھا۔

الیکشن کمیشن نے بلوچستان اسمبلی کی سات نشستوں پر ووٹوں کی دوبارہ گنتی کے احکامات جاری کر دیے ہیں۔

صوبائی اسمبلی کی جن نشستوں پر دوبارہ گنتی ہوگی ان میں کوئٹہ کی تین نشستیں پی بی 40، پی 41 اور پی بی 43 شامل ہیں۔

اس کے ساتھ ساتھ پشین کی دو نشستوں پی بی 48 اور پی بی 49 پر دوبارہ گنتی ہو گی۔

قلعہ عبد اللہ کی نشست پی بی 50 اور چمن کی نشست پی بی 51 پر بھی دوبارہ گنتی کے احکامات جاری کیے گئے ہیں۔

مسلم لیگ( ن) کی رہنما عظمیٰ بخاری کا کہنا ہے کہ یہ عجیب بات ہے کہ جہاں راناثنا اللہ کو شکست کا سامنا کرنا پڑا، وہاں الیکشن شفاف ہوئے لیکن جہاں یاسمین راشد ہار جاتی ہیں، وہاں دھاندلی ہوئی ہے۔

لاہور میں پریس کانفرنس کرتے ہوئے عظمی بخاری کا مزید کہنا تھا کہ سعد رفیق کے حلقے میں شفاف الیکشن ہوا ہے لیکن جن علاقوں میں یہ لوگ ہار گئے، وہاں دھاندلی ہوئی ہے۔

عام انتخابات کے بعد جہاں وفاق میں حکومت بنانے کے لیے سیاسی جماعتوں کے درمیان مذاکرات کا سلسلہ جاری ہے وہیں صوبۂ پنجاب میں آزاد حیثیت سے انتخابات جیتنے والے امیدوار پاکستان مسلم لیگ نواز میں شامل ہونا شروع ہو گئے ہیں۔

اس سلسلے میں پنجاب کی نشست پی پی 48 سے کامیاب ہونے والے خرم ورک، پی پی 49 سے کامیاب ہونے والے رانا فیاض اور پی پی 94 سے کامیاب ہونے والے تیمور لالی نے مسلم لیگ نواز میں شامل ہونے کا اعلان کیا ہے۔

خیال رہے کہ الیکشن کمیشن کے جاری کردہ نتائج کے مطابق پنجاب کے 297 حلقوں میں سے 296 نشستوں کے نتائج آ چکے ہیں جن میں کامیاب ہونے والے 138 ارکان آزاد، 137 ارکان کا تعلق مسلم لیگ نواز سے، 10 ارکان کا تعلق پاکستان پیپلز پارٹی سے اور 8 کا تعلق پاکستان مسلم لیگ سے ہے۔

استحکام پاکستان پارٹی، پاکستان مسلم لیگ ضیا الحق شہید اور تحریک لبیک پاکستان کے ایک ایک امیدوار کامیاب ہوئے ہیں۔