تحریک انصاف کے حمایت یافتہ آزاد اراکین کس پارٹی میں شامل ہوں گے؟ حکومت سازی کے لیے رابطے شروع

خیبر پختونخوا کی 112 نشستوں کے عبوری نتائج آ چکے ہیں جب کہ ایک نشست پی پی 104 کا نتیجہ آنا باقی ہیں۔

الیکشن کمیشن کی جانب سے جاری کردہ عبوری نتائج کے مطابق آزاد امیدوار 90 نشستوں پر کامیابی کے ساتھ سب سے آگے ہیں۔ بیشتر آزاد امیدواروں کا تعلق پاکستان تحریکِ انصاف سے ہے۔

خیبر پختونخوا اسمبلی میں جمعیت علمائے اسلام پاکستان سات نشستوں کے ساتھ دوسرے نمبر پر ہے جب کہ مسلم لیگ ن پانچ، پیپلز پارٹی چار، جماعتِ اسلامی تین، تحریکِ انصاف پارلیمنٹرین دو اور عوامی نیشنل پارٹی نے ایک نشست حاصل کی ہے۔

خیبر پختونخوا کی دو نشستوں پر امیدواروں کے انتقال کی وجہ سے الیکشن کمیشن نے انتخابات ملتوی کر دیے تھے۔

بلوچستان اسمبلی کی 51 میں سے 45 نشستوں کا عبوری نتیجہ آ گیا جب کہ مزید چھ نتائج آنا باقی ہیں۔

الیکشن کمیشن کے مطابق پاکستان پیپلز پارٹی 11 نشستوں کے ساتھ سب سے آگے ہے جب کہ جمعیت علمائے اسلام پاکستان آٹھ نشستوں کے ساتھ دوسرے نمبر پر ہے۔

بلوچستان اسمبلی کی چھ نشستوں پر آزاد امیدواروں نے کامیابی حاصل کی ہے۔ بلوچستان عوامی پارٹی چار، نیشنل پارٹی، عوامی نیشنل پارٹی نے دو، دو جب کہ بلوچستان نیشنل پارٹی، بلوچستان نیشنل پارٹی عوامی نے ایک ایک نشست حاصل ہے۔

پاکستان کی برّی فوج کے سربراہ جنرل عاصم منیر نے کہا ہے کہ پاکستان کے عوام نے آئینِ پاکستان پر اپنا مشترکہ اعتماد ظاہر کیا ہے اور اب سیاسی جماعتوں کا فرض ہے کہ وہ سیاسی پختگی اور اتحاد کے ساتھ عوام کے اعتماد کا اسی انداز میں جواب دیں۔

فوج کے شعبہ تعلقاتِ عامہ (آئی ایس پی آر )کے مطابق آرمی چیف نے عام انتخابات کے انعقاد پر نگراں حکومت، الیکشن کمیشن، سیاسی جماعتوں اور تمام جیتنے والے امیدواروں کو مبارک باد دی ہے۔

جنرل عاصم منیر نے کہا کہ ووٹ کا حق استعمال کرنے کے لیے آزادانہ اور بلا روک ٹوک عوامی شرکت نے جمہوریت اور حکمرانی کے لیے ان کی وابستگی کا ثبوت دیا ہے۔

آرمی چیف کے مطابق 25 کروڑ آبادی والے ترقی پسند ملک کے لیے انتشار موزوں نہیں۔ انتخابات جیتنے اور ہارنے کا مقابلہ نہیں بلکہ عوام کے مینڈیٹ کا تعین کرنے کی مشق ہے۔

جنرل عاصم منیر نے کہا کہ ذاتی مفادات سے بالاتر ہوکر حکومت اور عوامی خدمت کی کوششوں کو ہم آہنگ کرنا چاہیے۔

عام انتخابات میں آزاد امیدواروں کی بڑی تعداد میں کامیابی کے بعد پاکستان تحریکِ انصاف نے اہم اجلاس طلب کر لیا ہے۔

پی ٹی آئی کے مطابق پارٹی کے سینئر رہنما اسد قیصر، بیرسٹر گوہر اور علی محمد خان سمیت دیگر رہنما ہفتے کو پشاور میں منعقد کیے جانے والے اجلاس میں شریک ہوں گے۔

پی ٹی آئی کا کہنا ہے کہ پارٹی رہنما آئندہ وفاقی اور صوبائی حکومت بنانے سے متعلق امور پر تبادلہ خیال کریں گے جب کہ اجلاس میں مختلف سیاسی جماعتوں کے ساتھ اتحاد پر بھی غور کیا جائے گا ۔