بلوچستان میں پیپلز پارٹی کے ٹکٹ پر باپ، بیٹا اور داماد کامیاب
بلوچستان میں عام انتخابات کے غیرسرکاری نتائج کے مطابق قومی اسمبلی کے حلقہ این اے 259 گوادر سے پاکستان پیپلز پارٹی کے ٹکٹ پر ملک شاہ گورگیج کامیاب ہوئے ہیں۔
ان کے بیٹے عبید اللہ گورگیج نے بھی پیپلز پارٹی کے ٹکٹ پر بلوچستان اسمبلی کے حلقہ پی بی 44 سے کامیابی حاصل کی ہے۔
ملک شاہ گورگیج کے داماد عبدالصمد گورگیج کو پیپلز پارٹی نے بلوچستان اسمبلی کے حلقہ پی بی 40 کے لیے ٹکٹ دیا تھا۔ انہوں نے یہ نشست جیت لی ہے۔
اس طرح ایک ہی پارٹی کے ٹکٹ پر قومی اور صوبائی اسمبلی کے حلقوں سے باپ، بیٹے اور داماد نے کامیابی حاصل کی ہے۔
تین آزاد ارکان کا پاکستان مسلم لیگ ن میں شمولیت کا اعلان
قومی اسمبلی میں کوئی بھی سیاسی پارٹی سادہ اکثریت حاصل نہیں کر سکی ا ور حکومت سازی کے لیے رابطے اور سیاسی جوڑ توڑ شروع ہو گیا ہے۔ ایسے میں آزاد حیثیت میں منتخب ہونے والے ارکان کی اہمیت بڑھ گئی ہے۔
اس سلسلے میں پہلی کامیابی پاکستان مسلم لیگ نون کو ملی ہے اور تین آزاد ارکان نے نون لیگ میں شامل ہونے کا اعلان کیا ہے۔
قومی اسمبلی کے حلقہ 253 سے آزاد امیدوار میاں محمد خان بگٹی نے پی ایم ایل این میں شامل ہونے کا اعلان کیا ہے۔وہ کوہلو، ہرنائی اور ڈیرہ بگٹی کے حلقے سے 46 ہزار 683 ووٹ لے کر کامیاب ہوئے ہیں۔
قومی اسمبلی کے حلقہ این اے 54 سے آزاد امیدوار بیرسٹر عقیل ملک نے بھی نون لیگ میں شامل ہونے کا اعلان کیا ہے۔انہوں نے راولپنڈی تھری سے 85 ہزار 912 ووٹ حاصل کیے اور روایتی حریفوں چوہدی نثار اور غلام سرور خان کو شکست دی۔
قومی اسمبلی کے حلقہ این اے 48 اسلام آباد تھری سے آزاد امیدوار راجہ خرم شہزاد نواز بھی مسلم لیگ نون میں شامل ہو گئے ہیں۔ وہ 69 ہزار 699 ووٹ لے کر کامیاب ہوئے ہیں۔
پی ایم ایل این کے صدر شہباز شریف نے ان کی شرکت کا خیرمقدم کیا ہے۔
تین ارکان کی شمولیت سے پاکستان مسلم لیگ نون کی نشستوں کی تعداد 73 سے بڑھ کر 76 ہو گئی ہے۔
خیبرپختونخوا: انتخابی نتائج کے معاملے پر کئی حلقوں میں کشیدگی، محسن داوڑ زخمی
نتائج میں دھاندلی کے الزامات؛ بلوچستان میں قوم پرست جماعتوں کا احتجاج