سپریم جوڈیشل کونسل نے جسٹس مظاہر نقوی کو مس کنڈکٹ کا مرتکب قرار دے دیا

پروونشل ڈیزاسٹر مینجمنٹ اتھارٹی بلوچستان نے صوبے میں حالیہ بارشوں سے ہونے والے نقصانات کی تفصیلی رپورٹ جاری کر دی ہے۔

رپورٹ کے مطابق صوبے بھر میں حالیہ بارشوں کے نتیجے میں اب تک پانچ افراد ہلاک اور 1250 سے زائد گھروں کو نقصان پہنچا ہے۔

رپورٹ کے مطابق 237 گھر مکمل طور پر تباہ جب کہ 1021 کو جزوی نقصان پہنچا ہے۔ سب سے زیادہ گوادر میں 1220 گھر متاثر ہوئے ہیں جب کہ کیچ میں 25، خاران میں سات، کوئٹہ چار اور بارکھان میں ایک گھر متاثر ہوا ہے۔

رپورٹ کے مطابق گوادر، کیچ اور خاران میں بارشوں سے ہونے والے نقصانات کا سروے اور متاثرہ علاقوں میں ریلیف آپریشن جاری ہے۔

اسلام آباد کی احتساب عدالت نے سابق وزیرِ اعظم نواز شریف کے صاحبزادوں حسن اور حسین نواز کے دائمی وارنٹ معطلی کی درخواست پر فیصلہ محفوظ کر لیا ہے۔

حسین اور حسن نواز نے ایون فیلڈ، فلیگ شپ اور العزیزیہ ریفرنسز میں وارنٹ معطلی کی درخواستیں دائر کی تھیں جن پر جج ناصر جاوید رانا نے سماعت کی۔

عدالت وارنٹ معطلی پر محفوظ فیصلہ آج دو بجے سنائے گی۔

ملزمان کی جانب سے وکیل قاضی مصباح احتساب عدالت میں پیش ہوئے اور دلائل میں کہا کہ ایون فیلڈ ریفرنس میں پانچ ملزمان تھے جن میں سے تین کو سزا ہوئی جب کہ حسین اور حسن نواز کے عدالت حاضر نہ ہونے کے باعث دائمی وارنٹ جاری ہوئے تھے۔

وکیل نے عدالت سے استدعا کی کہ حسین اور حسین نواز بارہ مارچ کو پاکستان آنا چاہتے ہیں اور وہ عدالت کے سامنے پیش ہو جائیں گے، اس لیے ان کے دائمی وارنٹ معطل کیے جائیں۔

نیب حکام نے مؤقف اختیار کیا کہ ملزمان عدالت کے سامنے پیش ہونا چاہتے ہیں تو عدالت موقع دے سکتی ہے۔ ناقابلِ ضمانت اور دائمی وارنٹس کا مقصد ہوتا ہے کہ ملزم عدالت کے سامنے پیش ہو۔

عدالت نے فریقین کے دلائل سننے کے بعد درخواست پر فیصلہ محفوظ کر لیا ہے۔

پشاور ہائی کورٹ کے لارجر بینچ نے قومی اسمبلی می مخصوص نشستوں پر ایک روز قبل دیے گئے حکمِ امتناع میں13 مارچ تک توسیع کر دی ہے۔

پانچ ججز پر مشتمل بینچ نے یہ فیصلہ اٹارنی جنرل کی عدم موجودگی کی بنیاد پر سنایا۔

جسٹس اشتیاق ابراہیم کی سربراہی میں پانچ رکنی لارجر بینچ نے سنی اتحاد کونسل کی مخصوص نشستوں کے لیے دائر درخواست پر سماعت کی تو اس موقع پر درخواست گزار وکلا، ایڈیشنل اٹارنی جنرل اور دیگر فریق وکلا عدالت میں پیش ہوئے۔

گزشتہ سماعت پر عدالت نے مخصوص نشستوں پر منتخب ہونے والے ارکان کو آج تک حلف نہ لینے کا حکم دیا تھا اور الیکشن کمیشن کو جواب جمع کرانے کا حکم دیا تھا۔

ایڈیشنل اٹارنی جنرل ثناء اللہ نے عدالت کو بتایا کہ انہوں نے اٹارنی جنرل سے رابطہ کیا مگر وہ آج سپریم کورٹ میں مصروف ہیں۔

ایڈیشنل اٹارنی جنرل نے مخصوص نشستوں کے معاملے پر عدالت سے مزید مہلت دینے کی استدعا کی اور کہا کہ کیس کی تیاری کے لیے بھی وقت چاہیے۔

درخواست گزار کے وکیل قاضی انور نے کہا کہ نئے ایڈووکیٹ جنرل کی تعیناتی آج ہوگی جس کے بعد وہ کیس میں پیش ہوں گے۔

عدالت نے فریقین کے مؤقف کو سننے کے بعد سماعت 13 مارچ تک ملتوی کردی۔

واضح رہے کہ الیکشن کمیشن نے پانچ مارچ کو سنی اتحاد کونسل کے حصے کی مخصوص نشستیں دیگر سیاسی جماعتوں میں تقسیم کرنے کا حکم دیا تھا۔کمیشن کے اس فیصلے کو سنی اتحاد کونسل نےپشار ہائی کورٹ میں چیلنج کیا تھا۔

صدرِ پاکستان عارف علوی نے جسٹس نعیم اختر افغان کو سپریم کورٹ آف پاکستان میں تعینات کر دیا۔ جسٹس نعیم اختر افغان بلوچستان ہائی کورٹ کے چیف جسٹس ہیں۔

بلوچستان ہائی کورٹ کے سینئر ترین جج جسٹس محمد ہاشم خان کاکڑ کی بطور قائمقام چیف جسٹس بلوچستان ہائی کورٹ تعیناتی کی بھی منظوری دے دی گئی۔

صدرِ مملکت نے جسٹس ملک شہزاد احمد خان کی بطور چیف جسٹس لاہور ہائی کورٹ تعیناتی کی بھی منظوری دے دی۔ جسٹس ملک شہزاد احمد خان لاہور ہائی کورٹ کے سینئر ترین جج ہیں۔