سپریم جوڈیشل کونسل نے جسٹس مظاہر نقوی کو مس کنڈکٹ کا مرتکب قرار دے دیا

سنی اتحاد کونسل نے قومی اسمبلی اور چاروں صوبائی اسمبلیوں میں خواتین اور اقلیتوں کی مخصوص نشستیں نہ ملنے کا معاملہ لاہور ہائی کورٹ میں چیلنج کر دیا ہے۔

کونسل کے چیئرمین صاحبزادہ حامد رضا نے عدالتِ عالیہ میں درخواست دائر کی۔ درخواست میں مؤقف اختیار کیا گیا ہے کہ اسمبلی میں سیٹوں کے تناسب سے سنی اتحاد کونسل کو مخصوص نشستیں ملنی چاہئیں۔ سنی اتحاد کونسل نے الیکشن لڑا یا نہیں، اس سے کوئی فرق نہیں پڑتا۔

صاحبزادہ حامد رضا نے ایڈووکیٹ اشتیاق اے خان کی وساطت سے درخواست دائر کی جس میں الیکشن کمیشن کو فریق بنایا گیا ہے۔ درخواست میں کہا گیا ہے کہ الیکشن کمیشن نہ تو ٹربیونل ہے اور نہ ہی عدالت۔ الیکشن کمیشن کا عمل آئین میں ترمیم کے مترادف ہے۔

درخواست میں کہا گیا ہے کہ الیکشن کمیشن کا فیصلہ اپنے اختیارات سے تجاوز ہے، عدالت الیکشن ایکٹ کا سیکشن 104، رول 94 خلاف آئین قرار دے۔

چیئرمین پاکستان تحریکِ انصاف (پی ٹی آئی) گوہر علی خان نے لاہور میں اعتزاز احسن سے ملاقات کی ہے۔

ملاقات میں موجود ہ ملکی سیاسی صورتِ حال پر بھی تبادلۂ خیال کیا گیا۔ ملاقات میں تحریک انصاف کے عدالتوں میں کیسز کے حوالے سے بھی قانونی مشاورت کی گئی۔

مخصوص نشستیں سنی اتحاد کونسل کے بجائے دوسرے جماعتوں کو دینے کے حوالے سے آئینی نکات پر بھی مشاورت کی گئی ۔

صدرِ پاکستان عارف علوی نے جسٹس نعیم اختر افغان کو سپریم کورٹ آف پاکستان میں تعینات کر دیا۔ جسٹس نعیم اختر افغان بلوچستان ہائی کورٹ کے چیف جسٹس ہیں۔

بلوچستان ہائی کورٹ کے سینئر ترین جج جسٹس محمد ہاشم خان کاکڑ کی بطور قائمقام چیف جسٹس بلوچستان ہائی کورٹ تعیناتی کی بھی منظوری دے دی گئی۔

صدرِ مملکت نے جسٹس ملک شہزاد احمد خان کی بطور چیف جسٹس لاہور ہائی کورٹ تعیناتی کی بھی منظوری دے دی۔ جسٹس ملک شہزاد احمد خان لاہور ہائی کورٹ کے سینئر ترین جج ہیں۔

پشاور ہائی کورٹ کے لارجر بینچ نے قومی اسمبلی می مخصوص نشستوں پر ایک روز قبل دیے گئے حکمِ امتناع میں13 مارچ تک توسیع کر دی ہے۔

پانچ ججز پر مشتمل بینچ نے یہ فیصلہ اٹارنی جنرل کی عدم موجودگی کی بنیاد پر سنایا۔

جسٹس اشتیاق ابراہیم کی سربراہی میں پانچ رکنی لارجر بینچ نے سنی اتحاد کونسل کی مخصوص نشستوں کے لیے دائر درخواست پر سماعت کی تو اس موقع پر درخواست گزار وکلا، ایڈیشنل اٹارنی جنرل اور دیگر فریق وکلا عدالت میں پیش ہوئے۔

گزشتہ سماعت پر عدالت نے مخصوص نشستوں پر منتخب ہونے والے ارکان کو آج تک حلف نہ لینے کا حکم دیا تھا اور الیکشن کمیشن کو جواب جمع کرانے کا حکم دیا تھا۔

ایڈیشنل اٹارنی جنرل ثناء اللہ نے عدالت کو بتایا کہ انہوں نے اٹارنی جنرل سے رابطہ کیا مگر وہ آج سپریم کورٹ میں مصروف ہیں۔

ایڈیشنل اٹارنی جنرل نے مخصوص نشستوں کے معاملے پر عدالت سے مزید مہلت دینے کی استدعا کی اور کہا کہ کیس کی تیاری کے لیے بھی وقت چاہیے۔

درخواست گزار کے وکیل قاضی انور نے کہا کہ نئے ایڈووکیٹ جنرل کی تعیناتی آج ہوگی جس کے بعد وہ کیس میں پیش ہوں گے۔

عدالت نے فریقین کے مؤقف کو سننے کے بعد سماعت 13 مارچ تک ملتوی کردی۔

واضح رہے کہ الیکشن کمیشن نے پانچ مارچ کو سنی اتحاد کونسل کے حصے کی مخصوص نشستیں دیگر سیاسی جماعتوں میں تقسیم کرنے کا حکم دیا تھا۔کمیشن کے اس فیصلے کو سنی اتحاد کونسل نےپشار ہائی کورٹ میں چیلنج کیا تھا۔