تحریکِ انصاف کا احتجاج: اسلام آباد میں تعلیمی ادارے بند، انٹرنیٹ سروس معطل

تحریکِ انصاف کے حامی پاکستان کے ساتھ ساتھ کئی ممالک میں آج احتجاج کر رہے ہیں۔

پی ٹی آئی کے حامی فلوریڈا کے پام بیچ پر مارالاگو میں امریکہ کے منتخب صدر ڈونلڈ ٹرمپ کی رہائش گاہ کے باہر بھی ہفتے کو جمع ہوئے۔

انہوں نے ہاتھوں میں پرچم اور کارڈ بورڈز تھامے ہوئے تھے جن پر عمران خان کی رہائی کے مطالبات درج تھے۔

خیبر پختونخوا کے وزیرِ اعلیٰ علی امین گنڈاپور پشاور سے اسلام آباد کے لیے روانہ ہو گئے ہیں۔

مقامی میڈیا کے مطابق علی امین گنڈا پور کے ہمراہ عمران خان کی اہلیہ بشریٰ بی بی بھی تھیں۔

تاہم بعد ازاں وہ ان کے قافلے سے الگ ہو کر اسلام آباد کی جانب روانہ ہوئی ہیں۔

وفاقی وزیرِ منصوبہ بندی احسن اقبال نے کہا ہے کہ تحریکِ انصاف کا احتجاج مکمل طور پر ناکام ہوگا اور صورتِ حال معمول پر آ جائے گی۔

لاہور میں پریس کانفرنس میں احسن اقبال نے کہا ہے کہ عمران خان کو کسی ڈپٹی کمشنر کے حکم پر گرفتار یا نظر بند نہیں ہیں۔ عمران خان آج عدالتی اور قانونی مقدمات میں گرفتار ہیں جن سے رہائی کا واحد راستہ قانونی چارہ جوئی ہے۔ اگر عدالتیں ان کو رہا کرتے ہیں تو ان کی رہائی ہو جائے گی۔

انہوں نے کہا کہ حکومت کے پاس کوئی اختیار نہیں ہے کہ عمران خان کو رہا کرے۔ ان کو عدالتوں سے خود کو کلیئر کرانا ہوگا۔

وفاقی دارالحکومت اسلام آباد کی پولیس کے انسپکٹر جنرل (آئی جی) علی ناصر رضوی نے کہا ہے کہ اسلام آباد میں بھرپور سیکیورٹی پلان تشکیل دیا گیا ہے۔

آئی جی علی ناصررضوی نے کاڈی چوک کے دورے کے دوران گفتگو میں کہا کہ سیکیورٹی پلان کا مقصد شرانگیزی کو روکنا ہے۔

آئی جی اسلام آباد کا دعویٰ تھا کہ کوئی بھی روڈ بند ہے تو اس کے ساتھ ایک لین کو کھلا رکھا گیا ہے۔

واضح رہے کہ مقامی میڈیا میں یہ رپورٹس سامنے آ رہی ہیں کہ بیشتر شاہراہوں کو مکمل طور پر بند کر دیا گیا ہے۔

آئی جی کا کہنا تھا کہ اسلام آباد ایئر پورٹ آنے اور جانے والے راستے کھلے ہوئے ہیں۔ رکاوٹیں ہیں لیکن آمد و رفت کے سلسلے کو بند نہیں کیاگیا۔

انہوں نے احتجاج کے شرکا کو متنبہ کیا کہ کسی کے پاس اسلحہ یا ممنوعہ چیز ہو گی تواس کے خلاف کارروائی کی جائے گی۔