موبائل فون سروس چل رہی ہے، صرف انٹرنیٹ بند ہے: وفاقی وزیرِ داخلہ
پاکستان کے وفاقی وزیر داخلہ محسن نقوی نے کہا ہے کہ تحریکِ انصاف کے آخری احتجاج کے دوران جو مظاہرین پکڑے گئے تھے ان میں 33 فی صد غیر ملکی تھے۔
اسلام آباد میں صحافیوں سے گفتگو میں محسن نقوی کا کہنا تھا کہ موبائل فون چل رہے ہیں، موبائل پر صرف انٹرنیٹ کو بند کیا گیا ہے۔
محسن نقوی نے مزید کہا کہ کوئی بھی احتجاج کے لیے اسلام آباد آئے گا تو اسے گرفتار کیا جائے گا۔
انہوں نے دعویٰ کیا کہ اسلام آباد میں فیض آباد آنے والےتمام لوگوں کو گرفتار کر لیا گیا ہے۔
ان کا مزید کہنا تھا کہ اس بار سڑکیں بند نہیں جتنی پچھلی بار بند ہوئی تھیں۔ شر انگیزی کوئی بھی پھیلا سکتا ہے۔
محسن نقوی نے کہا کہ مظاہرین نے اس روٹ پر آنے کی کوشش کی ہے جس روٹ سے مہمان صدر کے قافلے نے آنا ہے۔ غیر ملکی وفد پاکستان پہنچ رہا ہے۔
پی ٹی آئی کے احتجاج پر محسن نقوی کا کہنا تھا کہ کوشش ہے کہ اسلام آباد کے رہائشیوں کو کم سے کم تکلیف ہو۔ عوام کا تحفظ ترجیح ہے۔
فیض آباد میں تحریکِ انصاف کے کارکن اور پولیس آنے سامنے
اسلام آباد کے فیض آباد انٹر چینج پر پولیس نے پی ٹی آئی کے حامیوں کو روکنے کے لیے شیلنگ کی ہے۔
پی ٹی آئی عمران خان کی کال پر 24 نومبر کو اسلام آباد میں احتجاج کر رہی ہے۔
حکومت نے اس احتجاج کو روکنے کے لیے رکاوٹیں کھڑی کی ہیں۔ دار الحکومت میں اہلکاروں کی بھاری نفری تعینات ہے۔
حکومت بوکھلاہٹ کا شکار ہے؛ وزرا کے بیانات پر پی ٹی آئی کا ردِ عمل
پاکستان تحریکِ انصاف نے اپنے احتجاج سے متعلق وزرا کے بیانات پر ردِ عمل میں کڑی تنقید کی ہے۔
ترجمان پی ٹی آئی کا کہنا ہے کہ عوام کے سمندر سے خوف زدہ حکومت بوکھلاہٹ کا شکار ہے اور اس نے ملک کو کنٹینرستان بنا دیا ہے۔
ان کا کہنا تھا کہ پورے پنجاب میں کرفیو نافذ کر کے عوام کو محصور کرنا بھی عوامی سمندر کو روکنے میں سود مند ثابت ہوتا دکھائی نہیں دے رہا۔
انہوں نے کہا کہ قوم جاگ چکی ہے اور اپنے چوری شدہ مینڈیٹ کی واپسی اور حقیقی آزادی کے لیے نکلے گی۔
راستے بند ہونے کی ذمے دار پی ٹی آئی ہے: عطا تارڑ
وفاقی وزیر اطلاعات عطاءاللہ تارڑ نے کہا ہے کہ جو راستے بند ہیں اس کی ذمے دار صرف پی ٹی آئی ہے۔
انہوں نے کہا کہ جو اسلام آباد آئے گا وہ گرفتار ہوگا ان کے خلاف سخت ترین کاروائی ہوگی۔ قانون ہاتھ میں لینے کی کسی کو اجازت نہیں دیں گے۔ کسی کو امن خراب کرنے کی اجازت نہیں دی جائے گی۔
عطا تارڑ نے کہا کہ تحریک انصاف کے لوگ رضاکارانہ طور پر گرفتاریاں دے رہے ہیں۔ پی ٹی آئی این آر او چاہتی ہے اور ان کا مطالبہ صرف یہ ہے کہ ہمارے ساتھ ڈیل کرو ہمارے لیڈر کو آزاد کر دیا جائے۔ اس کے لیے احتجاج کے بجائے عدالتوں سے رجوع کرنا چاہیے۔
ان کا کہنا تھا کہ کرم میں جو کچھ ہوا اور وہاں آج بھی وہاں مظاہرے ہوئے صوبائی حکومت کو وہاں جا کر حالات کنٹرول کرنے چاہییں۔
اسلام آباد میں پیر کو تمام تعلیمی ادارے بند رکھنے کا فیصلہ
اسلام آباد کی انتظامیہ نے اعلان کیا ہے کہ پیر کو تمام تعلیمی ادارے بند رہیں گے۔
ضلعی انتظامیہ کے ترجمان نے کہا ہے کہ تعلیمی اداروں کی بندش کے سرکاری اعلامیے کا اطلاق تمام تعلیمی اداروں پر ہوگا جو کچھ دیر میں جاری ہوگا۔
ضلعی انتظامیہ اسلام آباد کے ترجمان کا کہنا ہے کہ تعلیمی ادارے بند رکھنے کا فیصلہ موجودہ صورتِ حال کے پیشِ نظر کیا گیا ہے۔