قومی اسمبلی اور سینیٹ کے اجلاس غیر معینہ مدت تک ملتوی، آئینی ترامیم کا بل پیش نہ ہو سکا

پاکستان تحریکِ انصاف کے ارکانِ اسمبلی کو رہا کر دیا گیا ہے۔ رہنماؤں کو پارلیمنٹ لاجز میں رکھا گیا تھا پیر کو پارلیمنٹ لاجز سے پولیس ہٹا دی گئی۔

جوڈیشل مجسٹریٹ کی جانب سے گرفتار ایم این ایز کی رہائی کے احکامات جاری کیے گئے تھے۔ رہا ہونے والوں میں شیر افضل مروت شاہ، احد نسیم شاہ ، شیخ وقاص اکرم، اویس احمد چٹھہ شامل ہیں۔

اسپیکر قومی اسمبلی نے اجلاس غیر معینہ مدت کے لیے ملتوی کر دیا ہے۔ اس سے پہلے سینیٹ کا اجلاس غیر معینہ مدت کے لیے ملتوی کیا گیا تھا۔

پیر کو ہونے والے اجلاس میں بھی آئینی ترامیم کا مسودہ پیش نہ ہو سکا۔

گزشتہ دو دن سے یہ امکان ظاہر کیا جا رہا تھا کہ حکومت آئینی مسودہ پارلیمان میں پیش کر سکتی ہے۔

اب حکومتی ارکان نے عندیہ دیا ہے کہ کچھ دن میں آئینی ترامیم پر اتفاقِ رائے کے بعد مسودہ ایوان میں پیش کیا جا سکتا ہے۔

پشتونخوا ملی عوامی پارٹی کے سربراہ محمود خان اچکزئی کا خطاب میں کہنا تھا کہ اب بال حکومت کی کورٹ میں ہے۔

قومی اسمبلی میں خطاب میں انہوں نے کہا کہ ہم سب ایوان کی بالا دستی اور طاقت کے سر چشمے کے طور پر دیکھنا چاہتے ہیں۔

انہوں نے کہا کہ کل کچھ تو تھا جس کی پردہ داری تھی ۔

ان کا مزید کہنا تھا کہ جمہوری ترمیم کے لیے ووٹ آپ کا ہے۔ لیکن گڑ بڑ نہ کریں۔

متحدہ قومی موومنٹ پاکستان کے رہنما فاروق ستار کا کہنا تھا کہ اپوزیشن ڈرافٹ اور ورکنگ پیپر نہ ملنے کا شکوہ کر رہی ہے ۔

قومی اسمبلی میں خطاب میں فاروق ستار نے کہا کہ خصوصی کمیٹی میں ڈرافٹ نہ رکھتے تو ورکنگ پیپر رکھ دیتے۔

حکومت کا اتحادی ہونے کے لیے حوالے سے ایم کیو ایم کے رہنما نے کہا کہ متحدہ حکومت کی اتحادی ضرور ہے۔ لیکن ہم مسلم لیگ (ن) نہیں ہیں۔

حکومت پر تنقید کرتے ہوئے ان کا کہنا تھا کہ طریقۂ کار ٹھیک نہیں کریں گے تو اصلاحات نہیں ہوں گی۔