مسلم لیگ (ن) کے خواجہ سعد رفیق کو شکست
لطیف کھوسہ کو مبارک باد پیش کرتا ہوں، سعد رفیق
پاکستان مسلم لیگ ن کے مرکزی رہنما خواجہ سعد رفیق نے شکست کے بعد فاتح امیدوار سردار لطیف کھوسہ کو مبارک باد دی ہے۔
سعد رفیق نے ایک بیان میں کہا کہ وہ عوامی فیصلے پر خوش دلی سے سر ِ تسلیم خم کرتے ہیں۔ انہوں نے اس تمنا کا اظہار کیا کہ اللّٰہ کریم آنے والی پارلیمان کو متحد ہو کر قومی بحرانوں پر قابو پانے کی توفیق و تقویت عطا فرماۓ۔
قومی اسمبلی کی 67 نشستوں کے نتائج، آزاد امیدوار آگے
الیکشن کمیشن نے قومی اسمبلی کی 265 میں سے 67 نشستوں کے غیر سرکاری نتائج کا اعلان کر دیا ہے جس کے مطابق آزاد امیدوار 23 نشستوں پر کامیابی کے ساتھ سب سے آگے ہیں۔
الیکشن کمیشن کے مطابق غیر سرکاری نتائج کے مطابق پیپلز پارٹی قومی اسمبلی کی 22 اور مسلم لیگ ن 18 نشستیں جیتنے میں کامیاب رہی ہے۔
بلوچستان نیشنل پارٹی، جمعیت علمائے اسلام پاکستان، متحدہ قومی موومنٹ پاکستان اور پاکستان مسلم لیگ نے ایک ایک نشست حاصل کی ہے۔
انتخابی نتائج میں تاخیر؛ الیکشن کمیشن کیا کہتا ہے؟
پاکستان میں آٹھ فروری کو ہونے والے عام انتخابات کے نتائج آنے کا سلسلہ جاری ہے۔ نتائج میں تاخیر پر بہت سے حلقے الیکشن کمیشن کو تنقید کا نشانہ بنا رہے ہیں۔ تازہ ترین انتخابی نتائج بتا رہے ہیں الیکشن کمیشن اسلام آباد سے ایم بی سومرو۔
وائس آف امریکہ کے لیے ایم بی سومرو سے گفتگو کرتے ہوئے پیپلزپارٹی کے رہنما سید خورشید شاہ کا کہنا تھا کہ 1988 سے 2018 تک ہونے والے انتخابات میں اتنی تاخیر نہیں ہوئی تھی۔
اُن کا کہنا تھا کہ اگر تاخیر نتائج کو تبدیل کرنے کے لیے کی جا رہی ہے تو مینڈیٹ پر اثر پڑے گا۔
الیکشن کمیشن کی ترجمان نگہت صدیق کے بقول "الیکشن کے دن بڑی تعداد میں ووٹرز ووٹ کے لیے نکلے یہ عمل الیکشن پر ان کے اعتماد کو ظاہر کرتا ہے۔"
ان کا مزید کہنا تھا کے انتخابات کے دن انٹرنیٹ کا مسئلہ سامنے آیا جس کی وجہ سے جو نتائج ایپ کے ذریعے آر اوز کو موصول ہونے تھے وہ نہیں ہو پائے۔