70 فی صد نوجوان ووٹ دینے کے خواہش مند؛ ’یوتھ ووٹر باہر نکلا تو سیاسی معجزہ ہوگا‘
وائس آف امریکہ اردو کے حالیہ سروے کے مطابق پاکستان کے 70 فی صد نوجوانوں نے آٹھ فروری کو انتخابات میں ووٹ ڈالنے کا ارادہ ظاہر کیا ہے۔ سیاسی مبصرین کے مطابق اگر نوجوان اتنی بڑی تعداد میں ووٹ دینے نکلتے ہیں تو انتخابی سیاست میں کئی بڑی تبدیلیاں ہو سکتی ہیں۔
وی او اے نے یہ سائنٹیفک سروے ملٹی نیشنل کمپنی ’اپسوس‘ کے ذریعے کرایا تھا جس میں 18 سے 34 برس کے افراد کی رائے لی گئی تھی۔
اس سروے میں شامل ایسے نوجوان جو 2018 کے الیکشن میں ووٹ دینے کے اہل تھے ان میں سے 64 فی صد نے ووٹ کاسٹ کیا تھا۔ جب کہ آئندہ الیکشن میں 70 فی صد نوجوانوں نے ووٹ ڈالنے کا ارادہ ظاہر کیا ہے۔
الیکشن کمیشن آف پاکستان کے مطابق ملک میں 18 سے 35 سال کے ووٹرز کی تعداد پانچ کروڑ 68 لاکھ سے زائد ہے اور مجموعی ووٹرز میں ان کی شرح 44 فی صد سے زائد بنتی ہے۔
مبصرین کے نزدیک اگر نوجوان ووٹرز کا ٹرن آؤٹ زیادہ ہوتا ہے تو اس سے ووٹ ڈالنے کی مجموعی شرح میں بھی اضافہ ہو گا۔
تاہم بعض تجزیہ کاروں کا کہنا ہے کہ انتخابات کی شفافیت پر اٹھنے والے سوالات کی وجہ سے ووٹرز میں انتخابی عمل سے متعلق لاتعلقی بڑھ رہی ہے جو ووٹنگ ٹرن آؤٹ پر بھی اثر انداز ہو گی۔
مسلم لیگ (ن) کا قصور میں جلسہ
پاکستان مسلم لیگ (ن) کے قائد اور سابق وزیرِ اعظم نواز شریف نے کہا ہے کہ نو فروری کا سورج ملکی، ترقی اور خوشحالی کا پیغام لے کر طلوع ہو گا۔
قصور میں جلسے سے خطاب کرتے ہوئے نواز شریف کا کہنا تھا کہ پاکستان تحریکِ انصاف کی حکومت نے عوام سے جھوٹے وعدے کیے، 50 لاکھ گھروں کی اُمید دلائی گئی۔ لیکن کوئی وعدہ پورا نہیں ہوا۔
جلسے سے خظاب کرتے ہوئے سابق وزیرِ اعظم شہباز شریف کا کہنا تھا کہ نواز شریف چوتھی مرتبہ ملک کے وزیرِ اعظم بنے تو مہنگائی ختم کریں گے۔
مسلم لیگ (ن) نے قصور میں میدان سجا لیا
پاکستان مسلم لیگ (ن) نے انتخابی مہم کے آخری روز قصور میں میدان سجا لیا ہے۔ جلسے سے پارٹی کے قائد نواز شریف، چیف آرگنائزر مریم نواز سمیت دیگر رہنما خطاب کریں گے۔
بلاول لاڑکانہ میں جلسے سے خطاب کریں گے
پاکستان پیپلز پارٹی نے انتخابی مہم کے آخری روز لاڑکانہ میں میدان سجا لیا، پارٹی چیئرمین بلاول بھٹو زرداری کارکنوں سے خطاب کریں گے۔
پی ٹی آئی کی خواتین رضا کار کس طرح مہم چلا رہی ہیں؟
پاکستان تحریکِ انصاف کے حمایت یافتہ آزاد امیدواروں کی انتخابی مہم میں خواتین پیش پیش ہیں۔ یہ خواتین رضا کار گھر گھر جا کر ووٹرز کا اعتماد جیتنے کی کوشش کر رہی ہیں۔ لیکن اس دوران انہیں کن مسائل کا سامنا ہے؟ ویڈیو دیکھیے۔