’پوری رات اسلام آباد میں تھا، ان کو نہیں ملا‘؛ وزیرِ اعلیٰ گنڈاپور کی اسمبلی اجلاس میں اچانک آمد

وزیرِ اعلیٰ خیبر پختونخوا علی امین گنڈا پور کے خطاب کے بعد صوبائی اسمبلی کا اجلاس ملتوی کر دیا گیا ہے۔

اسپیکر نے پیر تک اسمبلی کا اجلاس ملتوی کرتے ہوئے کہا کہ ایوان کی کارروائی یہیں سے دوبارہ آگے بڑھائی جائے گی۔

اسپیکر کا کہنا تھا کہ پیر کو دن تین بجے اسمبلی کا اجلاس ہوگا۔

وزیرِ اعلیٰ خیبر پختونخوا علی امین گنڈا پور نے کہا ہے کہ وہ پوری رات اسلام آباد میں تھے۔

پولیس کا ذکر کرتے ہوئے ان کا کہنا تھا کہ ’’ان کی کارکردگی یہ ہے کہ ان کو پوری رات نہ مل سکا۔ ڈی چوک پر احتجاج کا کہا تھا۔ کل وہاں موجود تھے۔‘‘

گزشتہ روز سے لاپتا رہنے کے بعد ایوان میں اچانک آمد کے بعد اسمبلی کے اجلاس سے خطاب میں ان کا کہنا تھا کہ اسلام آباد کی خیبر پختونخوا ہاؤس پر ہلا بولا گیا۔ آنسو گیس کے شیل فائر کیے گئے اور توڑ پھوڑ کی گئی۔ اسلام آباد پولیس کے آئی جی کو صوبائی اسمبلی کے فلور پر معافی مانگنی ہو گی۔

انہوں نے اعلان کیا کہ اسلام آباد کے آئی جی کے خلاف مقدمہ درج کرائیں گے۔

ان کا مزید کہنا تھا کہ خیبر پختونخوا میں گورنر راج لگانا ہے تو لگا دیا جائے۔ دھمکیوں سے نہیں ڈرتا۔

انہوں نے کہا کہ آئین میں ترمیم ایک شخص کے لیے کی جا رہی ہے۔

خیبر پختونخوا کے وزیرِ اعلیٰ علی امین گنڈا پور صوبائی اسمبلی کے جاری اجلاس میں اچانک پہنچ گئے ہیں۔

مقامی میڈیا کے مطابق علی امین گنڈا پور گزشتہ روز سے لاپتا تھے۔

ایوان میں ان کے داخل ہونے پر تحریکِ انصاف کے ارکان نے نعرے بازی شروع کر دی۔ تاہم یہ واضح نہیں ہو سکا کہ وہ گزشتہ روز سے کہاں تھے۔

خیبرپختونخوا اسمبلی نے قرار داد منظور کی ہے جس میں وزیرِ اعلیٰ اور ارکانِ صوبائی اسمبلی کی مبینہ گرفتاری کی مذمت کی گئی ہے۔

صوبائی وزیرِ قانون آفتاب عالم آفریدی کی پیش کردہ قرار داد میں کہا گیا ہے کہ کے پی ہاؤس میں جو کچھ ہوا اس کی تحقیقات کی جائیں اور ذمے داران کو سزا دی جائے۔

قرار داد میں کہا گیا ہے کہ کے پی ہاؤس وفاقی دارالحکومت میں صوبے کی وفاق سے وابستگی کی علامت ہے اور ہمارے لیے تقدس کا درجہ رکھتا ہے۔ یہ ایوان پولیس اور رینجرز کی جانب سے کے پی ہاؤس کے تقدس کی پامالی کی مذمت کرتا ہے۔

قرارداد میں کہا گیا ہے کہ کے پی ہاؤس کا تقدس جی ایچ کیو اور کسی اور فوجی تنصیبات سے کم نہیں ہے۔ جن سول اور افوجی افسران نے پولیس اور رینجرز کے اہلکاروں کو کے پی ہاؤس پر دھاوا بولنے کے احکامات دیے ان کے خلاف کارروائی کی جائے۔

اسمبلی سے منظور قرارداد میں کہا گیا ہے کہ کے پی ہاؤس کے تقدس کی پامالی کرنے والے سول اور عسکری ذمے داران کو قانون کے کٹہرے میں لایا جائے اور ان کا کورٹ مارشل کیا جائے۔