اسلام آباد اس وقت قلعے کا منظر پیش کر رہا ہے: فواد چوہدری

تحریکِ انصاف کے رہنما فواد چوہدری نے کہا ہے کہ اسلام آباد اس وقت ایسے قلعے کا منظر پیش کر رہا ہے جو بڑی فوج کے محاصرے میں ہو۔

الیکشن کمیشن عمران خان کے خلاف توشہ خانہ ریفرنس کا فیصلہ آج سنائے گا۔ اس سے قبل اسلام آباد میں سیکیورٹی کے سخت انتظامات کیے گئے ہیں۔

اس تناظر میں فواد چوہدی نے جمعے کو ایک ٹویٹ میں کہا کہ ابھی تو جنگ کا آغاز ہوا ہے ابھی سے گھبرا گئے۔ معاملے کو اس نہج پر لے کر جایا جائے کہ جہاں سے واپسی ممکن نہ ہو۔

عمران خان کے خلاف فیصلہ آنے پر پی ٹی آئی خیبرپختونخوا نے احتجاج کی کال دے دی

پاکستان تحریکِ انصاف کے چیئرمین عمران خان کے خلاف توشہ خانہ ریفرنس میں فیصلہ خلاف آنے کی صورت میں پی ٹی آئی خیبرپختونخوا نے احتجاج کی کال دے دی ہے۔

پی ٹی آئی خیبر پختونخوا کے ٹوئٹر ہینڈل سے سابق وزیرِ اعلٰی پرویز خٹک کا پشتو زبان میں ایک آڈیو پیغام سنا جا سکتا ہے جس میں وہ کارکنوں کو تیار رہنے کی ہدایت کر رہے ہیں۔

پی ٹی آئی کے صوبائی صدر اور سابق وزیرِ اعلٰی پرویز خٹک نے اپنے ویڈیو پیغام میں کہا ہے کہ اگر توشہ خانہ ریفرنس میں عمران خان کے حق میں فیصلہ آیا تو ٹھیک ورنہ احتجاج کیا جائے گا۔

الیکشن کمیشن کے ذریعے مائنس ون فارمولے کو آگے نہ بڑھایا جائے: شاہ محمود قریشی

پاکستان تحریکِ انصاف کے وائس چیئرمین شاہ محمود قریشی نے کہا ہے کہ عدالتوں کے واضح احکامات کے باوجود الیکشن کمیشن نے مسلم لیگ (ن) اور پیپلزپارٹی کے فارن فنڈنگ کیسز میں کوئی پیش رفت نہیں کی۔

جمعے کو پارٹی رہنماؤں کے ہمراہ نیوز کانفرنس کرتے ہوئے شاہ محمود قریشی کا کہنا تھا کہ الیکشن کمیشن کو آئین کے تحت اپنی ذمے داری پوری کرنی چاہیے۔

اُں کا کہنا تھا کہ سینیٹ الیکشن سے قبل یوسف رضا گیلانی کے بیٹے کی جانب سے اراکین کو رشوت کی پیش کش کرنے کی ویڈیو وائرل ہوئی، لیکن الیکشن کمیشن اس پر خاموش ہے۔

شاہ محمود قریشی کا کہنا تھا کہ الیکشن کمیشن کے قوانین تمام سیاسی جماعتوں پر یکساں طور پر لاگو ہونے چاہئیں۔ الیکشن کمیشن کے ذریعے مائنس ون فارمولے کو آگے نہ بڑھایا جائے۔

توشہ خانہ ریفرنس میں الیکشن کمیشن نے عمران خان کو نااہل قرار دے دیا

الیکشن کمیشن آف پاکستان نے توشہ خانہ ریفرنس کا فیصلہ سناتے ہوئے چیئرمین تحریکِ انصاف کو نااہل قرار دے دیا ہے۔

الیکشن کمیشن کے پانچ رُکنی کمیشن نے محفوظ فیصلہ سناتے ہوئے عمران خان کو آرٹیکل تریسٹھ ون (پی) کے تحت نااہل قرار دیا۔

الیکشن کمیشن نے اپنے فیصلے میں کہا ہے کہ عمران خان صادق اور امین نہیں رہے، لہذٰا وہ اب رُکن قومی اسمبلی بھی نہیں رہے۔ الیکشن کمیشن نے عمران خان کی بطور رُکن قومی اسمبلی نشست خالی قرار دے دی ہے۔

فیصلے پر ردِعمل دیتے ہوئے تحریکِ انصاف کے رہنما فواد چوہدری نے کہا کہ یہ فیصلہ پاکستان کے آئین اور قانون پر حملہ ہے۔

فواد چوہدری کا کہنا تھا کہ یہ لوگ ہوتے کون ہیں یہ فیصلہ کرنے والے؟ فواد چوہدری نے کہا کہ الیکشن کمیشن کے اراکین اس قابل ہی نہیں ہیں کہ وہ عمران خان کے خلاف فیصلہ سنائیں۔

فواد چوہدری کا کہنا تھا کہ پاکستان کے عوام اس فیصلے کے خلاف اپنے حق کے لیے باہر نکلیں، یہ پاکستان میں انقلاب کا آغاز ہے۔

عمران خان کے خلاف یہ ریفرنس حکمراں اتحاد کی جانب سے دائر کیا گیا تھا۔

ریفرنس میں الزام عائد کیا گیا تھا کہ عمران خان نے توشہ خانہ سے ملنے والے تحائف کی تفصیلات ظاہر نہیں کیں اور انہیں مارکیٹ میں فروخت کر دیا۔

ریفرنس میں الیکشن کمیشن سے مطالبہ کیا گیا تھا کہ عمران خان نے اس معاملے میں جھوٹ بولا اور وہ صادق اور امین نہیں رہے۔ لہذٰا آئین کے آرٹیکل باسٹھ اور تریسٹھ کے تحت اُنہیں نااہل قرار دیا جائے۔

عمران خان کا اس ریفرنس میں یہ مؤقف رہا ہے کہ اُنہوں نے قواعد و ضوابط کے تحت توشہ خانہ سے یہ تحائف حاصل کیے اور اس ضمن میں کوئی بے ضابطگی نہیں ہوئی۔