پاکستان کے صدر عارف علوی نے کہا ہے کہ گلوبل وارمنگ میں پاکستان کا حصہ ایک فی صد سے بھی کم ہے لیکن اس کے پاکستان پر سنگین اثرات مرتب ہو رہے ہیں۔

اسلام آباد میں جمعرات کو منعقدہ پارلیمنٹ کے مشترکہ اجلاس سے خطاب کرتے ہوئے صدر مملکت نے کہا کہ سیلاب اس سال پاکستان کے لیے سب سے زیادہ مشکل کا باعث بنا ہے۔ انہوں نے کہا کہ سیلاب سے 1500 سے زائد افراد ہلاک ہوگئے۔

انہوں نے کہا کہ سیلاب نے تمام اسٹیک ہولڈرز نے سیلاب زدگان کی جس طرح مدد کی، اگر اس طرح کام نہیں کیا جاتا تو جانی و مالی نقصان زیادہ ہوتا۔

پارلیمنٹ سے صدر مملکت کے خطاب کے دوران متعدد اراکین کی جانب سے نعرے بازی بھی کی گئی اور رکن قومی اسمبلی علی وزیر کے پروڈکشن آرڈر جاری کرنے کے نعرے بھی لگائے گئے۔

صدر عارف علوی سے استعفے کا مطالبہ

جمعیت علمائے اسلام ف کے سربراہ مولانا فضل الرحمٰن نے صدر مملکت عارف علوی سے استعفے کا مطالبہ کیا ہے۔

مولانا فضل الرحمٰن نے ایک ٹویٹ میں کہا ہے کہ پارلیمانی سال کے آغاز پر صدر کی تقریر کے بائیکاٹ کے بعد صدر کے پاس اس عہدے پر موجود رہنے کا کوئی جواز نہیں۔

انہوں نے مزید کہا کہ صدر کو فوری طور پر اس عہدے سے مستعفی ہوجانا چاہیے۔

پیپلز پارٹی کے چیئرمین بلاول بھٹو زرداری نے بھی صدر کا مواخذہ جلد شروع کرنے کا مطالبہ کیا ہے۔

بلاول کا کہنا تھا کہ صدر عارف علوی نے سابق وزیرِ اعظم عمران خان کے خلاف عدم اعتماد کی تحریک کو سبوتاژ کرنے کے لیے ملی بھگت کی تھی۔ یہی نہیں انہوں نے انتقالِ اقتدار کے وقت آئین اور اپنے حلف کی خلاف ورزی کی تھی اس لیے پیپلز پارٹی نے اپنے اتحادیوں کے ساتھ مل کر صدر کے [پارلیمنٹ کے مشترکہ اجلاس سے] خطاب کا بائیکاٹ کیا۔

اثاثہ جات ریفرنس: وزیرِ خزانہ اسحاق ڈار احتساب عدالت میں پیش

وزیرِ خزانہ اسحاق ڈار اثاثہ جات ریفرنس میں اسلام آباد کی احتساب عدالت کے سامنے پیش ہو گئے ہیں۔

اسحاق ڈار وکلا کی ٹیم کے ہمراہ عدالت پہینچے جہاں سماعت کے دوران ان کے وکلا نے عدالت سے استدعا کی کہ ان کے موکل کی عدم حاضری پر اشتہاری ہونے کے باعث جاری وارنٹ گرفتاری منسوخ اور جائیداد ضبطگی کا حکم ختم کیا جائے۔

اپنی طرف سے کئی چالیں چل رہا ہوں‘، عمران خان کی ایک اور مبینہ آڈیو لیک ’

سابق وزیرِ اعظم عمران خان کی ایک اور مبینہ آڈیو لیک ہو گئی ہے جس میں انہیں پارلیمنٹ میں نمبر گیم پر بات کرتے ہوئے سنا جا سکتا ہے۔

عمران خان کی لیک ہونے والی آڈیو مختلف کلپس جوڑ کر بنائی گئی ہے جس میں وہ کہتے ہیں کہ وہ کئی چالیں چل رہے ہیں جو پبلک نہیں کر سکتے۔

چیئرمین تحریکِ انصاف کو یہ کہتے ہوئے بھی سنا جا سکتا ہے کہ وہ پانچ تو میں خرید رہا ہوں، میرے پاس پانچ ہیں میں نے میسج دینا ہے کہ وہ جو پانچ ہیں وہ بڑے اہم ہیں۔ اس کو کہیں کہ اگر وہ ہمیں پانچ اور لے دے اگر دس ہو جائیں تو گیم ہمارے ہاتھ میں ہے۔

مبینہ لیک آڈیو میں عمران خان نے کہا کہ اس وقت قوم الارم ہوئی ہے۔ لوگ چاہ رہے ہیں کہ کسی طرح ہم جیت جائیں۔ کوئی فکر نہ کریں کہ یہ ٹھیک ہے یا غلط۔ کوئی بھی حربہ ہو ایک ایک بھی اگر کوئی توڑ دیتا ہے تو اس سے بھی بہت فرق پڑے گا۔