رونلڈ ریگن واشنگٹن نیشنل ایئرپورٹ جمعرات کی صبح تک بند
مسافر طیارے اور فوجی ہیلی کاپٹر میں تصادم کے حادثے کے بعد رونلڈ ریگن واشنگٹن نیشنل ایئرپورٹ کو انتظامیہ نے مقامی وقت کے مطابق جمعرات کی صبح تک بند کر دیا ہے۔
میٹرو پولیٹن واشنگٹن ایئرپورٹس اتھارٹی کے حکام نے کہا ہے کہ ریگن نیشنل ایئرپورٹ جمعرات کی صبح 11 بجے تک بند رہے گا۔
حکام کے مطابق اس علاقے میں موجود دیگر ہوائی اڈوں میں میں آپریشنز معمول کے مطابق جاری ہیں۔
تصادم کے بعد طیارہ اور ہیلی کاپٹر دریا میں گرے ہیں: میئر واشنگٹن
واشنگٹن ڈی سی کی میئر موریل باؤزر نے کہا ہے کہ تصادم کے بعد مسافر طیارہ اور ہیلی کاپٹر دونوں پانی میں گرے ہیں۔
انہوں نے تصدیق کی کہ طیارے میں 64 افراد جب کہ ہیلی کاپٹر میں تین اہلکار سوار تھے۔
طیارہ 400 فٹ کی بلندی پر 225 کلومیٹر فی گھنٹے کی رفتار سے اڑ رہا تھا
رونلڈ ریگن واشنگٹن نیشنل ایئرپورٹ کے قریب دریائے پوٹومک کے اوپر حادثے سے قبل مسافر طیارہ 400 فٹ کی بلندی پر تھا۔
امریکی نشریاتی ادارے ’سی این این‘ کے مطابق ریڈیو ٹرانسپونڈر سے ملنے والی معلومات کے مطابق امیریکن ایئرلائنز کے طیارے کی رفتار 225 کلومیٹر فی گھنٹہ سے زائد تھی۔
رونلڈ ریگن واشنگٹن نیشنل ایئرپورٹ پر لینڈنگ سے قبل فوج کے ہیلی کاپٹر سے ٹکرانے کے سبب دونوں دریائے پوٹومک میں گر گئے۔
کینیڈین ساختہ اس مسافر طیارے میں دو انجن تھے جب کہ اسے 2004 میں بنایا گیا تھا۔ طیارے میں 70 افراد کے سوار ہونے کی گنجائش ہے۔
واشنگٹن ڈی سی میں طیارہ حادثہ؛ ریسکیو آپریشن کے لائیو مناظر