خواجہ آصف جیت گئے
پاکستان کے سابق وزیرِ خارجہ اور مسلم لیگ (ن) کے رہنما خواجہ محمد آصف سیالکوٹ سے قومی اسمبلی کے رکن منتخب ہوگئے ہیں۔
پاکستانی ذرائع ابلاغ کے مطابق سیالکوٹ کے حلقے این اے 73 کے غیر سرکاری غیر حتمی نتائج کے مطابق خواجہ آصف 116957 ووٹ لے کر کامیاب ہوگئے ہیں۔ ان کے مقابل پاکستان تحریکِ انصاف کے محمد عثمان ڈار نے 115464 ووٹ حاصل کیے۔
کامیاب اُمیدواروں کے نتائج فوراً جاری کیے جائیں: سردار اختر مینگل
بلوچستان نیشنل پارٹی کے سربراہ اور سابق وزیرِ اعلیٰ سردار اختر مینگل نے الیکشن کمیشن سے مطالبہ کیا ہے کہ وہ صوبے سے قومی اور صوبائی اسمبلی کی نشستوں کے نتائج فوراً جاری کرے۔
جمعرات کو اپنے آبائی علاقے وڈھ سے ٹیلی فون پر وائس آف امریکہ کے نمائندے عبدالستار کاکڑ سے گفتگو کرتے ہوئے سردار اختر مینگل نے نے کہا کہ الیکشن کمیشن نے صوبے کے اکثر حلقوں کے نتائج روک لیے ہیں اور یہ عمل انتخابات کے سارے عمل کو مشکوک بنا رہا ہے۔
انہوں نے کہا کہ سابقہ ادوار میں جب کمیونیکشن کے نظام نے اتنی تر قی نہیں کی تھی، پھر بھی رات 11 بجے تک نتائج جاری کردیے جاتے تھے لیکن اب جدید ٹیکنالوجی کے باوجود الیکشن کمیشن نے نتائج روکے ہوئے ہیں۔
سردار اختر مینگل کا کہنا تھا کہ الیکشن کمیشن کی مرتب کردہ ووٹر کی فہرستیں دُرست نہیں تھیں۔
انہوں نے کہا کہ ووٹ تلاش اور کاسٹ کرنے میں کافی وقت صرف ہوا، پولنگ مراکز کے سامنے لوگوں کی طویل قطاریں تھیں اور وقت ختم ہونے پر لوگوں کو ووٹ کا حق استعمال کرنے کی اجازت نہیں دی گئی۔
انہوں نے الزام لگایا کہ مکران، تربت اور بعض دیگر علاقوں میں بی این پی کے مخالفین سکیورٹی اہلکاروں کی موجودگی میں باکسز اُٹھا کر لے گئے جب کہ کوئٹہ، لسبیلہ، قلات، مکران اور بعض دیگر علاقوں میں ابھی تک حتمی نتائج اُ میدواروں کو نہیں دیے گئے ہیں۔
انہوں نے کہا کہ انتخابی نتائج روکنے سے یہ واضح ہورہا ہے کہ الیکشن صحیح طریقے سے نہیں ہوئے اور نہ الیکشن کمیشن کا طریقۂ کار دُرست تھا۔
سردار اختر مینگل نے کہا کہ وہ جلد کوئٹہ جائیں گے اور پارٹی کی مرکزی رہنماﺅں اور نومنتخب ارکان کا اجلاس طلب کر کے سارے انتخابی عمل کا جائزہ لیں گے اور اس کے بعد فیصلہ کریں گے کہ ان کی جماعت 'بی این پی' اپوزیشن بینچوں پر بیٹھے گی یا حکومت کا حصہ بنے گی۔
سردار مینگل نے کہا کہ پارٹی کے ارکان کی کامیابی پر اُن کو زیادہ خوشی اس لیے نہیں ہے کہ رواں ماہ بلوچستان میں ہونے والے دو خودکش حملوں نے ان کی پارٹی کے کارکنوں کی تمام خوشیاں چھین لی ہیں۔
'قائدِ اعظم محمد علی جناح میرے لیڈر ہیں'
پاکستان میں عام انتخابات میں اکثریت حاصل کرنے والی جماعت تحریکِ انصاف کے سربراہ عمران خان نے کہا ہے کہ اب ان کے اقتدار میں آ کر منشور پر عمل کرنے کا وقت ہے۔
الیکشن کے ابتدائی نتائج سامنے آنے کے بعد جمعرات کی دوپہر بنی گالا میں خطاب کرتے ہوئے کہا کہ ان کے لیڈر بانیٔ پاکستان محمد علی جناح اور آئیڈیل مدینے کی ریاست ہے۔
انہوں نے کہا کہ مدینے کی ریاست میں قانون کی بالادستی اور عدل تھا اور میرٹ پر فیصلے ہوتے تھے اور وہ ان کے بقول انہی اصولوں پر پاکستان کو چلانا چاہتے ہیں۔
انہوں نے کہا کہ ان کی ساری پالیسیاں 'ہیومن ڈویلپمنٹ' کرنے اور کمزور اور غریب طبقے کو آگے بڑھانے کے لیے ہوں گی۔
عمران خان نے کہا کہ وہ ایسا پاکستان چاہتے ہیں جس میں کمزور کی ذمہ داری لی جائے گی اور ملک میں فلاحی نظام ہو۔
عمران خان نے کہا کہ ان کی حکومت پہلی حکومت ہوگی جو کسی سیاسی مخالف کے خلاف انتقامی کارروائی نہیں کرے گی اور قانون کی بالادستی قائم کرے گی۔
آصف زرداری جیت گئے
پاکستان کے سابق صدر ضلع بے نظیر آباد (نواب شاہ) سے قومی اسمبلی کی نشست این اے 213 سے غیر سرکاری نتائج کے مطابق 111179 ووٹ لے کر جیت گئے ہیں۔ ان کے مقابلے میں گرینڈ ڈیموکریٹک الائنس (جی ڈی اے) کے شیر محمد رند نے 53521 ووٹ حاصل کیے۔
