بیشتر موٹرویز بند
موٹروے پولیس کے اعلامیے کے مطابق پشاور سے اسلام آباد اور اسلام آباد سے لاہور جانے والی موٹرویز احتجاج کے باعث ٹریفک کے لیے بند کردی گئی ہیں جب کہ لاہور سے شیخوپورہ کے ہرن مینار تک موٹروے کا حصہ بھی بند کردیا گیا ہے۔
اعلامیے کے مطابق 'ایم 3' اور 'ایم 4' موٹرویز مکمل طور پر ٹریفک کے لیے بند ہیں۔
کراچی میں ہڑتال سے معمولاتِ زندگی معطل
مذہبی جماعتوں کی اپیل پر کراچی کے بیشتر علاقوں میں مکمل ہڑتال ہے جب کہ سڑکوں پر ٹریفک معمول سے کہیں کم ہے۔ شہر میں شاہراہِ فیصل، ایم اے جناح روڈ، لیاقت آباد، ماڑی پور روڈ، کورنگی، کلفٹن، اور لگ بھگ 20 سے زائد دیگر اہم مقامات، شاہراہیں اور چوک احتجاج کے باعث ٹریفک کے لیے بند ہیں۔
شہر کے بیشتر بڑے بازار مسلسل تیسرے روز بھی بند ہیں جب کہ بیشتر علاقوں میں پیٹرول پمپ بھی نہیں کھلے ہیں۔
کراچی سے ہمارے نمائندے خلیل احمد کے مطابق شہر میں گرجا گھروں کی سکیورٹی سخت کردی گئی ہے۔
احتجاج سے ٹرینوں کی آمد و رفت متاثر
ریلوے حکام کا کہنا ہے کہ ملک بھر میں جاری مظاہروں کی وجہ سے ریل گاڑیوں کی آمدورفت بھی شدید متاثر ہوئی ہے۔
حکام کے مطابق راولپنڈی اور لاہور کے درمیان چلنے والی ریل کار ٹرین سروس بھی معطل ہے جب کہ راولپنڈی سے کراچی جانے والی ٹرینوں کو متبادل راستوں پر روانہ کیا جارہا ہے جس کی وجہ سے کئی ریل گاڑیوں کی آمد و رفت میں تاخیر ہو رہی ہے۔