متحدہ عرب امارات کے سب سے بڑے مندر کا افتتاح

بھارت کے وزیرِ اعظم نریندر مودی نے بدھ کو ابو ظہبی کے سب بڑے مندر کا افتتاح کیا ہے۔ افتتاحی تقریب کے موقع پر اماراتی حکومت کے ممبران، بالی وڈ اداکاروں سمیت دیگر شخصیات نے شرکت کی۔ متحدہ عرب امارات کی حکومت نے مندر کی تعمیر کے لیے 27 ایکڑ زمین تحفے میں دی تھی۔ اس مندر کو ہندو تنظیم شری اکشر پرشوتم سوامی نارائن سنستھا (بی اے پی ایس) نے تعمیر کیا ہے جس پر لگ بھگ 10 کروڑ ڈالر کی لاگت آئی ہے۔ متحدہ عرب امارات میں لگ بھگ 35 لاکھ بھارتی شہری مقیم ہیں۔ وزیرِ اعظم مودی نے ایک مسلم ملک میں مندر کا افتتاح ایک ایسے موقع پر کیا ہے جب حال ہی میں انہوں نے بھارت میں 16ویں صدی کی بابری مسجد کی جگہ تعمیر کیے جانے والے رام مندر کا افتتاح کیا تھا۔