حزب اللہ کے متوقع سربراہ بھی شاید مارے گئے ہیں: اسرائیل کا دعویٰ

امریکہ کے محکمۂ خارجہ کے حکام نے کہا ہے کہ لبنان سے امریکہ کی شہریت یا گرین کارڈ رکھنے والے 900 افراد انخلا کر چکے ہیں۔

ایک بیان میں کہا گیا ہے کہ امریکی حکومت کے فراہم کردہ طیاروں سے لبنان سے ستمبر کے آخر سے امریکی شہریوں کے انخلا کا عمل جاری ہے۔

محکمۂ خارجہ کے ترجمان میتھیو ملر نے کہا ہے کہ پیر کو بھی 150 امریکی شہریوں نے لبنان سے انخلا کیا ہے۔ یہ افراد خصوصی طیارے سے ترکیہ کے شہر استنبول پہنچے ہیں۔

اسرائیل کی فوج اور لبنان کی عسکری تنظیم حزب اللہ کے درمیان گزشتہ ماہ جنگ میں شدت آنے کے بعد امریکہ نے لگ بھگ آٹھ خصوصی طیاروں کا بندوبست کیا جو لبنان سے امریکہ کے شہریوں کا نکال چکے ہیں۔ ان میں سے سات طیاروں میں امریکہ ترکیہ گئے جب کہ ایک طیارہ جرمنی پہنچا۔

میتھیو ملر کا کہنا تھا کہ لبنان اور امریکہ کی دوہری شہریت رکھنے والے لگ بھگ ساڑھے آٹھ ہزار افراد نے بیروت میں امریکی سفارت خانے سے انخلا کے لیے رابطہ کیا ہے۔

امریکہ کے محکمۂ دفاع (پینٹاگون) نے کہا ہے کہ امریکی وزیرِ دفاع لائیڈ آسٹن کا اسرائیلی ہم منصب یوو گلینٹ سے رابطہ رہتا ہے اور وہ صورتِ حال پر تبادلۂ خیال کرتے رہتے ہیں۔

صحافیوں سے گفتگو میں پینٹاگون کے ترجمان پیٹ رائڈر کا مزید کہنا تھا کہ دونوں وزرائے دفاع کے رابطوں میں اسرائیل کے ممکنہ اقدامات زیرِ بحث آتے رہتے ہیں۔

انہوں نے عندیہ دیا کہ یوو گلینٹ آئندہ ہفتے لائیڈ آسٹن سے پینٹاگون میں ملاقات کریں گے۔

اسرائیل کی فوج نے کہا ہے کہ لبنان کے جنوبی ساحل پر جلد ہی آپریشن کا آغاز کیا جا رہا ہے۔

بیان میں متنبہ کیا گیا ہے کہ لبنان کے شہری ساحلی علاقے اور سمندر سے دور رہیں۔

پیر کو جاری بیان میں مزید کہا گیا ہے کہ لبنان کے ماہی گیر اور سمندری حدود استعمال کرنے والے دیگر افراد شمالی اسرائیل کے ساتھ سرحدی علاقے اور سمندر میں 40 کلومیٹر کی دوری پر رہیں۔

بیان میں کہا گیا ہے کہ وہ لوگ جو سمندر میں جائیں گے اور کشتیاں استعمال کریں گے وہ اپنی زندگیوں کو خطرے میں ڈالیں گے۔

فرانس کے دارالحکومت پیرس میں فرانسیسی صدر ایمانوئل میکرون نے غزہ میں یرغمال فرانس کے کی شہریت رکھنے والے افراد کے اہلِ خانہ سے ملاقات کی۔

حماس نے سات اکتوبر 2023 کو اسرائیل پر حملوں کے دوران ڈھائی سو افراد کو یرغمال بنایا تھا جن میں سے سو سے زائد کو رہا کیا جا چکا ہے جب کہ متعدد کی اموات ہو چکی ہیں۔ اسرائیلی حکام کے مطابق حماس کی تحویل میں ساٹھ سے زائد یرغمالی موجود ہیں۔

حماس کی تحویل میں موجود یرغمالوں میں فرانس کی شہریت رکھنے والے دو افراد بھی شامل ہیں۔ ان دونوں افراد کے اہلِ خانہ سے صدر ایمانوئل میکرون نے ملاقات میں یقین دہانی کرائی کہ فرانس کی حکومت غزہ میں جنگ بندی اور یرغمالوں کی بازیابی کے لیے ہر ممکن اقدام کرے گی۔