جعفر ایکسپریس حملہ: فوج کا آپریشن مکمل کرنے اور یرغمالوں کی رہائی کا دعویٰ

بلوچستان میں جعفر ایکسپریس پر حملے کی ذمہ داری قبول کرنے والی علیحدگی پسند تنظیم بلوچ لبریشن آرمی (بی ایل اے) نے حملے کی ایک مبینہ ویڈیو جاری کی ہے۔

بی ایل اے کی جاری کردہ ویڈیو میں دیکھا جا سکتا ہے کہ پہاڑوں کے درمیان سے گزرنے والی ٹرین کے ٹریک پر دھماکہ ہوتا ہے جس کے بعد ٹرین رک جاتی ہے۔

حملے کی مبینہ ویڈیو میں بی ایل اے کے عسکریت پسند کو پہاڑ پر پوزیشن لیے ہوئے بھی دکھایا گیا ہے۔

بی ایل اے کی جاری کردہ ویڈیو میں ٹرین کے رک جانے کے بعد باہر متعدد افراد کو زمین پر بیٹھے اور مسلح افراد کو گشت کرتے دکھایا گیا ہے۔

بلوچستان میں مسافر ٹرین جعفر ایکسپریس پر حملے کے بعد دوسرے روز بھی یرغمالوں کی بازیابی کے لیے آپریشن جاری ہے۔

خبر رساں ادارے 'رائٹرز' نے سیکیورٹی ذرائع کے حوالے سے رپورٹ کیا ہے کہ منگل کو لگ بھگ 50 علیحدگی پسندوں نے ریلوے ٹریک کو دھماکے سے اڑایا اور جعفر ایکسپریس پر راکٹوں سے حملہ کیا۔

ذرائع کا کہنا ہے کہ ٹرین میں چار سو سے زیادہ مسافر سوار تھے۔

چین نے پاکستان میں بلوچ عسکریت پسندوں کی جانب سے ٹرین ہائی جیکنگ کی مذمت کی ہے۔

بدھ کو وزارتِ خارجہ کی ترجمان ماؤ ننگ نے کہا کہ چین دہشت گردی کی ہر قسم کا مخالف ہے۔

انہوں نے کہا چین دہشت گردی کے مقابلے، اتحاد و استحکام، علاقائی امن اور عوام کی حفاظت کے لیے پاکستان کی کوششں میں اس کی معاونت جاری رکھے گا۔

سیکیورٹی ذرائع کا کہنا ہے کہ اب تک جعفر ایکسپریس کے 190 مسافروں کو بازیاب کرا لیا گیا ہے جب کہ 30 دہشت گردوں کو ہلاک کیا گیا ہے۔

سیکیورٹی ذرائع کے مطابق عورتوں اور بچوں کی خود کش بمباروں کے ساتھ موجودگی کی وجہ سے آپریشن میں احتیاط برتی جا رہی ہے۔

ذرائع کے مطابق باقی شدت پسندوں کے خاتمے کے لیے سیکیورٹی فورسز کا آپریشن جاری ہے۔