اقوام متحدہ کے سیکریٹری جنرل کی مشرق وسطی تنازعے کے پھیلاؤ کی مذمت
اقوام متحدہ کے سیکرٹری جنرل انتونیو گتریس نے ایران کی جانب سے اسرائیل پر میزائل داغے جانے کے بعد مشرق وسطیٰ کے تنازعے کے پھیلنے کی مذمت کی ہے۔
’ اس کو رک جانا چاہیے۔ ہمیں جنگ بندی کی ضرورت ہے‘ یہ مطالبہ انتونیو گتریس نے ایک تحریری بیان میں کیا ہے۔
’ایرانی میزائل مار گرائے جائیں‘ صدر بائیڈن کا امریکی فوج کو حکم
وائٹ ہاؤس کے مطابق، امریکہ کے صدر جو بائیڈن نے امریکی فوج کو حکم دیا ہے کہ ایران کے حملوں کے خلاف اسرائیل کی مدد کی جائے اور ایران کی طرف سے میزائلوں کو مار گرایا جائے۔
امریکی اخبار نیویارک ٹائمز نے ایک رپورٹ میں دعویٰ کیا ہے کہ ایران نے اسرائیل پر ایک سو سے زیادہ بیلسٹک میزائیل داغے ہیں۔
اخبار کے مطابق ان میزائیل حملوں کے نتیجے میں ابھی تک اسرائیل میں کسی جانی نقصان کی اطلاع سامنے نہیں آئی۔
روی او اے کے رپورٹر ہریندر مشرا نے یروشلم سے اطلاع دی ہے کہ اسرائیلی فوج نے عوام کو بم شیلٹروں سے نکلنے کی اجازت دے دی ہے، اور میزائل حملہ ختم ہو چکا ہے۔
ReplyForward
ایران نے اسرائیل پر درجنوں بیلسٹک میزائل داغنے کی ذمہ داری قبول کرلی
ایسوسی ایٹڈ پریس نے اسرائیلی فوج کے حوالے سے کہا ہے کہ ایران نے اسرائیل پر میزائل حملہ کیا ہےاور اسرائیل میں ایسے سائرن سنائی دیے ہیں جن میں ے شہریوں سے کہا ہے کہ وہ میزائل حملے سے بچنے کے لیے پناہ گاہوں میں چلے جائیں۔
تل ابیب اور یروشلم کے قریب کھڑکیوں کو ہلادینے والے دھماکے سنے گئے ، تاہم فوری طور پر یہ واضح نہیں ہوسکا کہ آیا یہ آوازیں میزائلوں کی لینڈنگ کی تھیں یا اسرائیلی دفاعی نظام کی جانب سے انہیں روکے جانے کی، یا دونوں کی۔
اسرائیلی فوج کے ترجمان رئیر ایڈمرل ڈینیل ہگاری نے کہا ہے کہ ملک کا فضائی دفاعی نظام مکمل طور پر آپریشنل ہے اور خطرے کو شناخت کر کے اسے روک رہا ہے۔
اس سے قبل، ایک سینئر امریکی عہدے دار نے خبردار کیا تھا کہ ایران اسرائیل پر بیلسٹک میزائل حملے کی تیاری کر رہا ہے اور اگر ایسا کوئی حملہ ہوا تو اسے ’سنگین نتائج‘ کا سامنا کرنا پڑے گا۔
عہدے دار نے اپنا نام ظاہر نہ کرنے کی درخواست کی تھی۔
انٹرنیٹ پر جار ی کیے گئے ایک نوٹس میں، اسرائیل میں امریکی سفارت خانے نے ’تمام امریکی سرکاری ملازمین اور ان کے خاندان کے افراد کو ہدایت کی ہے کہ وہ اگلے نوٹس تک پناہ گاہوں کے قریب موجود رہیں‘ ۔
یہ میزائل حملے ایک ایسے وقت میں سامنے آئے ہیں جب اسرائیل کی فوج نے منگل کو بتایا تھا کہ جنوبی لبنان میں اس کے زمینی دستوں نے ایران کی حمایت یافتہ حزب اللہ کے عسکریت پسندوں کے خلاف حملہ شروع کیا ہے اور وہاں سے شدید لڑائی کی اطلاعات ہیں۔
اسرائیلی حملوں میں حزب اللہ کے کئی رہنما ہلاک ہو چکے ہیں، جن میں گروپ کے اعلیٰ رہنما حسن نصراللہ بھی شامل ہیں۔
اقوامِ متحدہ کے سیکریٹری جنرل کا لبنان میں فوری جنگ بندی پر زور
اقوامِ متحدہ کے سیکریٹری جنرل انتونیو گوتریس نے لبنان میں فوری جنگ بندی پر زور دیتے ہوئے کہا ہے کہ لبنان کی خودمختاری اور علاقائی سالمیت کا احترام کیا جانا چاہیے۔
سیکریٹری جنرل کے ترجمان کی جانب سے جاری کیے گئے بیان میں کہا گیا ہے کہ لبنان میں ایک مکمل جنگ سے ہر صورت بچنا ہو گا۔
ترجمان کا کہنا تھا کہ سیکریٹری جنرل نے لبنان کے وزیرِ اعظم سے بھی بات کی ہے جب کہ وہ کشیدگی کے خاتمے کے لیے رابطے جاری رکھیں گے۔