جسٹس یحییٰ آفریدی کی بطور چیف جسٹس آف پاکستان تعیناتی کا نوٹی فکیشن جاری

خیبر پختونخوا بار کونسل نے جسٹس یحییٰ آفریدی کی بطور چیف جسٹس پاکستان تعیناتی کا خیر مقدم کیا ہے۔

بدھ کو جاری ایک اعلامیے میں خیبر پختونخوا بار کونسل کا کہنا تھا کہ جسٹس یحییٰ آفریدی غیر متنازع، غیر سیاسی اور غیر جانبندار شخصیت ہیں اور وہ بطور چیف جسٹس پاکستان پارلیمنٹ کی بالادستی، قانون کی پاسداری، آئین کی عمل داری، سستا اور فوری انصاف کی فراہمی میں تمام صلاحتیں بروئے کار لائیں گے۔

سندھ ہائی کورٹ بار ایسوسی ایشن اور سندھ بار کونسل نے بھی جسٹس یحییٰ آفریدی کو نیا چیف جسٹس پاکستان تعینات کرنے کا خیر مقدم کیا ہے۔

اپنے الگ الگ بیان میں بار ایسوسی ایشن اور بار کونسل نے نئے چیف جسٹس کو مبارک باد دی اور امید ظاہر کی کہ جسٹس یحییٰ آفریدی کی تعیناتی سے ملک میں عدلیہ کو فائدہ ہوگا اور انصاف کی فراہمی ممکن ہو گی، مزید یہ کہ تمام شہریوں کے مساوی حقوق کا بھی تحفظ کیا جائے گا۔

کراچی بار ایسوسی ایشن نے جسٹس منصور علی شاہ کو چیف جسٹس پاکستان تعینات نہ کرنے کی مذمت کی ہے۔

بار ایسوسی ایشن کی جانب سے بدھ کو جاری ایک بیان کہا گیا کہ کراچی بار امید رکھتا ہے کہ جسٹس یحییٰ آفریدی عدلیہ کے تشخص کو بحال کریں گے جسے ان کے بقول سبکدوش ہونے والے چیف جسٹس قاضی فائز عیسیٰ نے نقصان پہنچایا ہے۔