غزہ میں اسرائیلی حملے میں عورتوں اور بچوں سمیت 100 فلسطینی ہلاک

ایران کے رہبرِ اعلیٰ علی خامنہ ای نے کہا ہے کہ ایرانی حکام کو طے کرنا چاہیے کہ وہ اسرائیل کے سامنے اپنی قوت کا مظاہرہ کس طرح کریں گے۔

ایران کی سرکاری خبر رساں ایجنسی ارنا کے مطابق خامنہ ای نے کہا کہ دو راتیں قبل اسرائیل نے جو کارروائیاں کی ہیں انہیں نہ ہی کم کرکے بیان کرنا چاہیے اور نہ ہی ان میں مبالغہ کیا جائے۔

علی خامنہ ای کے بیان میں فوری کسی کارروائی کی بات نہیں کی گئی ہے۔ تاہم انہوں نے ایرانی حکام کو کہا ہے کہ اسرائیل کو ایران کی طاقت دکھانی چاہیے لیکن اس کا فیصلہ حکام عوامی اور قومی مفاد کو مدِ نظر رکھتے ہوئے کریں۔

تل ابیب کے شمالی شہر رمت ہیشرون میں اتوار کو ٹرک ڈرائیور نے اپنا ٹرک بس اسٹاپ پر چڑھا دیا جس کی وجہ سے کم از کم 24 افراد زخمی ہو گئے۔

تاہم پولیس نے ابھی تک یہ واضح نہیں کیا کہ یہ کوئی حادثہ تھا یا جان بوجھ کر حملہ کیا گیا۔

پولیس کی ابتدائی تحقیقات کے مطابق ٹرک ڈرائیور نے بس اسٹاپ پر پہلے سے کھڑی بس کو بھی ہِٹ کیا۔

رپورٹس کے مطابق پولیس کا کہنا تھا کہ موقعے پر موجود شہریوں نے ٹرک ڈرائیور کو گولی مار کر ہلاک کر دیا۔

اسرائیلی فوج کا کہنا ہے کہ جنوبی لبنان میں اس کے چار مزید اہلکار ہلاک ہو گئے ہیں۔

فوج کے مطابق لبنان میں رواں سال 30 ستمبر سے زمینی جنگ شروع ہونے کے بعد سے اب تک ہلاک ہونے والے اسرائیلی فوجیوں کی تعداد 36 ہو گئی ہے۔

اتوار کو جاری کردہ بیان میں اسرائیلی فوج کا کہنا تھا کہ یہ فوجی ہفتے کو جنوبی لبنان میں جنگ کے دوران مارے گئے۔

اسرائیل کی شمالی غزہ میں فضائی کارروائی میں کم از کم 22 افراد ہلاک ہو گئے۔

غزہ کی وزارت صحت کے مطابق ہفتے کو رات گئے اسرائیل کے فضائی حملے میں ہلاک ہونے والوں میں 11 خواتین اور دو بچے بھی شامل ہیں۔

رپورٹس کے مطابق اسرائیل نے شمالی قصبے بیت الحیہ میں واقع گھروں اور عمارتوں پر حملے کیے۔

غزہ کی وزارت صحت کے مطابق 15 سے زائد افراد زخمی ہیں جبکہ ہلاکتوں میں اضافہ بھی ہو سکتا ہے۔

اس کارروائی پر اسرائیلی فوج کی طرف سے فوری طور پر کوئی رد عمل سامنے نہیں آیا۔