اسرائیل نے غزہ کے لیے خوراک کی تجارتی درآمد روک دی، رپورٹ
اسرائیل نےغزہ میں خوراک درآمد کرنے کی تاجروں کی درخواستوں پر کام روک دیا ہے۔
خبر رساں ادارے 'رائٹرز' نے تجارت میں شامل افراد کے حوالے سے خبر دیتے ہوئے کہا ہے کہ اس اقدام سے غزہ کے لوگوں کے لیے گزشتہ چھ ماہ میں نصف سے زیادہ مہیا کی جانے والی خوراک کی راہ بند ہوگئی ہے۔
ذرائع کے مطابق گیارہ اکتوبر سے غزہ کے تاجروں کی "کوگاٹ" نامی اسرائیلی پروگرام تک رسائی ختم ہوگئی ہے جو اسرائیل اور مقبوضہ مغربی کنارے سے خوراک کی کمرشل شپمینٹ کاکام کرتا ہے۔ تاجروں کو اس معاملے پر رابطہ کرنے کی کوششیں بھی بےسود رہی ہیں۔
رائٹرز نےاسرائیل کے سرکاری ڈیٹا کے تجزیہ کی بنیاد پر رپورٹ کیا ہے کہ اس تبدیلی سے غزہ میں جنگ کے شروع ہونے کے بعد سے غزہ میں اشیا کی درآمد اس وقت کم ترین سطح پر پہنچ گئی ہے۔
اسرئیلی ایجنسی کوگاٹ نے رائٹرز کے رابطہ کرنے پر غزہ میں خوراک کی درآمد اور امداد کے حوالے سے سوالوں کا کوئی جواب نہیں دیا۔ ایجنسی کا کہنا ہے کہ وہ تمام ممکنہ اقدامات اٹھاتی ہے جن کے ذریعہ کافی مقدار میں امداد غزہ کی ساحلی پٹی میں داخل ہوسکے۔ ایجنسی کہتی ہے کہ اسرائیل انسانی امداد کی ترسیل کو نہیں روکتا۔
جمعے کو غزہ پر اسرائیل کے حملے، تین بچوں سمیت متعدد افراد ہلاک
اسرائیل نے حماس کے لیڈر یحیٰ سنوار کو ہلاک کر کے عسکریت پسند گروپ کو ایک بڑا دھچکا پہنچانے کے بعد اسکے خاتمےکی اپنی ایک سالہ جنگ کو آگے بڑھاتے ہوئے جمعے کے روز غزہ پر متعدد شدید حملے کیے ۔
اے ایف پی کے صحافیوں کے مطابق سنوار کی ہلاکت سے غزہ پر اسرائیلی حملوں کا سلسلہ ختم نہیں ہوا ۔ جمعرات کو رات بھر اور جمعے کو علی الصبح تک متعدد حملوں نے علاقے کو ہلا کر رکھ دیا۔
غزہ کے شہری دفاع کے ادارے کے مطابق امدادی کارکنوں نے شمال میں ایک گھر پر علی الصبح کے ایک حملے کے بعد گھر کے ملبے سے تین فلسطینی بچوں کی لاشیں نکالیں ۔
اب جب غزہ میں ایک سال سے زیادہ عرصے کی جنگ سے حماس پہلے ہی کمزور ہو چکی ہے ، سنوار کی موت تنظیم کےلیے ایک شدید دھچکا ہے لیکن یہ واضح نہیں ہے کہ آیا اب اسکی اپنی اسٹریٹیجی میں کوئی تبدیلی واقع ہو گی۔
سنوار کی ہلاکت کا خیر مقدم کرتےہوئےاسرائیلی وزیر اعظم بنجمن نیتن یاہو نے کہا کہ سات اکتوبر2023 کو حماس کے حملے نے جس جنگ کو جنم دیا وہ ختم نہیں ہوئی ہے ، لیکن انہوں نے مزید کہا کہ یہ انجام کی شروعات،ہے۔
یحییٰ سنوار لڑائی کے دوران جان کی بازی ہار گئے ہیں: حماس رہنما کی تصدیق
حماس کے رہنما خلیل الحیا نے تصدیق کی ہے کہ حماس کے سربراہ یحییٰ سنوار جمعرات کو لڑائی کے دوران جان کی بازی ہا ر گئے ہیں۔
خبر رساں ادارے 'ایسوسی ایٹڈ پریس' کے مطابق جمعے کو جاری کیے گئے ایک بیان میں حماس رہنما کا کہنا تھا کہ جب تک ؒغزہ میں جنگ بند نہیں ہو جاتی اور اسرائیلی فوج نکل نہیں جاتی، اس وقت تک یرغمالوں کو رہا نہیں کیا جائے گا۔
اسرائیلی وزیرِ اعظم کی جانب سے لڑائی جاری رکھنے کا اعلان اور جنگ بندی کی ٹوٹتی اُمیدیں
اسرائیل کے وزیرِ اعظم بن یامین نیتن یاہو کی جانب سے حماس کے سربراہ یحییٰ سنوار کی ہلاکت کے باوجود جنگ جاری رکھنے کے اعلان پر مشرقِ وسطیٰ میں جنگ بندی کی اُمیدیں پھر سے دم توڑ رہی ہیں۔
خیال تھا کہ یحیی سنوار کی ہلاکت کے بعد ایک سال سے جاری غزہ جنگ ختم ہو سکتی ہے۔ تاہم اسرائیلی وزیرِ اعظم کا کہنا ہے کہ جب تک حماس ہتھیار نہیں ڈال دیتی اور اسرائیلی یرغمالوں کو بازیاب نہیں کرا لیا جاتا، جنگ جاری رہے گی۔
وزیرِ اعظم نیتن یاہو نے ایران کا نام لیے بغیر کہا ہے کہ "ہمارے پاس برائی کے محور کو روکنے اور ایک بہتر مستقبل بنانے کا ایک بہترین موقع ہے۔"
نیتن یاہو کا بیان صدر بائیڈن اور دیگر مغربی رہنماؤں کے بیانات سے مختلف ہے جس میں ان رہنماؤں نے اُمید ظاہر کی تھی کہ یحییٰ سنوار کی ہلاکت سے جنگ بندی کی راہ ہموار ہو گی۔
اسرائیلی فوج نے یحیٰ سنوار کی ویڈیو جاری کر دی