جارحیت کے خلاف دفاع کا حق رکھتے ہیں، ایران کا اسرائیلی حملے کے بعد ردِ عمل

سعودی عرب کا کہنا ہے کہ ایران پر حملے میں اس کی فضائی حدود استعمال نہیں ہوئی۔

خبر رساں ادارے 'رائٹرز' کے مطابق ایک سعودی عہدے دار نے بتایا ہے کہ ایران پر ہونے والے اسرائیلی فضائی حملے میں سعودی عرب کی فضائی حدود کا استعمال نہیں ہوا۔

سعودی عرب نے ایران کے عسکری اہداف کو نشانہ بنانے کی مذمت کی ہے۔

ہفتے کو سعودی وزارتِ خارجہ کے ایک بیان میں کہا گیا ہےکہ ایران کے عسکری اہداف کو نشانہ بنانا اس کی خود مختاری اور بین الاقوامی قوانین اور اصولوں کی خلاف ورزی ہے۔

بیان میں کہا گیا کہ سعودی عرب خطے میں جاری کشیدگی اور تنازع کے پھیلاؤ کو مسترد کرتا ہے اور اس پر ایک غیر متزلزل مؤقف رکھتا ہے۔

سعودی عرب کی وزارتِ خارجہ کے بقول تنازع کا پھیلاؤ خطے کے ممالک اور عوام کی سلامتی و استحکام کے لیے خطرہ ہے۔

ایران نواز لبنانی عسکری تنظیم حزب اللہ نے کہا ہے کہ اس نے اسرائیل کے تل نوف اڈے پر حملے کے لیے ڈرون بھیجے ہیں۔

خبر رساں ادارے 'رائٹرز' کے مطابق ہفتے کو ایک بیان میں حزب اللہ نے کہا کہ اس نے شمالی اسرائیلی شہر صفد میں ایک انٹیلی جینس بیس کو بھی نشانہ بنایا ہے۔

اسرائیل کی جانب سے حزب اللہ کے اس دعوے پر فی الحال کوئی بیان سامنے نہیں آیا۔

دونوں فریقوں کے درمیان کشیدگی کا آغاز گزشتہ برس اکتوبر سے ہوا تھا لیکن حالیہ دنوں میں اس میں اضافہ ہوا ہے۔

جرمنی کے چانسلر اولاف شولز نے اسرائیل کے ایرانی فوجی اہداف پر حملے کے بعد ایران کو کسی بھی قسم کی کشیدگی بڑھانے سے خبر دار کیا ہے۔

ہفتے کو سماجی رابطے کی سائٹ 'ایکس' پر ایک بیان میں انہوں نے کہا کہ ایران کے لیے ان کا پیغام واضح ہے۔ بڑے پیمانے پر بڑھتے ہوئے ردِعمل کو جاری نہیں رکھنا چاہیے اور اسے فوری روکنا چاہیے۔

ان کے بقول اسی صورت میں ہم مشرقِ وسطیٰ میں امن کے امکانات کھول سکتے ہیں۔