مشرقِ وسطیٰ میں بڑی جنگ ہوئی تو بھارت کا کیا مؤقف ہو گا؟
بھارت کی جانب سے مشرقِ وسطیٰ کی صورتِ حال پر مسلسل تشویش کا اظہار کیا جا رہا ہے۔ اس نے تمام فریقوں سے اپیل کی ہے کہ وہ سفارت کاری اور مذاکرات سے تنازعات کو حل کریں۔
نئی دہلی میں اس بات پر گفتگو ہو رہی ہے کہ اگر صورتِ حال مزید کشیدہ ہوتی ہے تو تمام فریقوں سے اپنے تعلقات کے پیشِ نظر بھارت کا کیا مؤقف ہونا چاہیے۔
تجزیہ کاروں کا خیال ہے کہ اگر صورتِ حال اور خراب ہوتی ہے اور ایران اور اسرائیل میں باضابطہ جنگ چھڑ جاتی ہے تو بھارت کو متوازن اور غیر جانبدارانہ مؤقف اختیار کرنا چاہیے۔
ان کا خیال ہے کہ اس نے یوکرین روس تنازع میں جو پالیسی اپنائی تھی وہی یہاں بھی اپنائے گا۔
یاد رہے کہ ایران نے اسرائیل پر تقریباً 200 بیلسٹک میزائلوں سے حملہ کیا تھا۔ اس کا کہنا ہے کہ اس نے اسماعیل ہنیہ اور حسن نصر اللہ کی ہلاکت کا بدلہ لینے کے لیے یہ حملہ کیا ہے۔
حزب اللہ کے سینئر رہنما ہاشم صفی الدین جمعے سے ناقابلِ رسائی ہیں، رائٹرز
خبر رساں ادارے رائٹرز کے مطابق لبنان کے تین سیکیورٹی ذرائع نے بتایا ہے کہ حزب اللہ کے سینئر رہنما اور تنظیم کے متوقع سربراہ ہاشم صفی الدین جمعے رابطے میں نہیں ہیں۔
اسرائیل نے جمعرات اور جمعے کی شب بیروت ایئرپورٹ کے قریب ایک عمارت کو نشانہ بنایا تھا اور امکان ظاہر کیا جا رہا تھا کہ اس حملے میں ہاشم صفی الدین مارے گئے ہیں۔
حزب اللہ نے اسرائیلی حملے کے بعد سے تاحال ہاشم صفی الدین سے متعلق کوئی بیان جاری نہیں کیا ہے۔
ایرانی وزیرِ خارجہ دمشق پہنچ گئے
ایران کے وزیرِ خارجہ عباس عراقچی شام کے دارالحکومت دمشق پہنچ گئے ہیں۔
خبر رساں ادارے 'رائٹرز' کے ماطبق ایرانی وزارتِ خارجہ کے ترجمان نے ایک بیان میں کہا ہے کہ وزیرِ خارجہ عباس عراقچی شامی حکام سے علاقائی صورتِ حال اور دوطرفہ تعلقات پر تبادلہ خیال کے لیے دمشق پہنچے ہیں۔
اسرائیلی فوج ایران کو میزائل حملے کا جواب دینے کی تیاریوں میں مصروف، رپورٹ
اسرائیلی فوج کے عہدیدار نے کہا ہے کہ ایران کے میزائل حملوں کا جواب دینے کی تیاری کر رہے ہیں۔
خبر رساں ادارے 'اے ایف پی' کے مطابق اسرائیلی عہدیدار نے نام ظاہر نہ کرنے کی شرط پر بتایا ہے کہ اسرائیلی ڈیفنس فورسز ایران کی جانب سے اسرائیلی شہریوں اور اسرائیل پر غیرقانونی حملے کے ردِ عمل کی تیاری میں مصروف ہے۔
تاہم عہدیدار نے یہ نہیں بتایا کہ اسرائیلی فوج کی جوابی کارروائی کب اور کس نوعیت کی ہوگی۔
لبنان: اسرائیل کے حملے میں حماس کے کمانڈر اہلِ خانہ سمیت ہلاک
فلسطینی عسکری تنظیم حماس نے شمالی لبنان کے ایک پناہ گزین کیمپ پر اسرائیلی حملے میں اپنے کمانڈر کی ہلاکت کی تصدیق کی ہے۔
خبر رساں ادارے 'اے ایف پی' کے مطابق حماس نے ایک بیان میں کہا ہے کہ کمانڈر سعید عطاءاللہ علی کے بداوی کیمپ میں موجود گھر پر اسرائیلی حملے میں ان کی اہلیہ اور دو بیٹیاں بھی ماری گئی ہیں۔
غزہ جنگ کے آغاز کے بعد سے اسرائیل نے بداوی کیمپ کو پہلی مرتبہ نشانہ بنایا ہے۔
واضح رہے کہ لبنان میں فلسطینی پناہ گزینوں کے درجنوں کیمپس موجود ہیں جہاں فلسیطنی برسوں سے مقیم ہیں۔