قطر کے امیر کا 'وحشیانہ حملوں' کے شکار لبنان کی مدد کا وعدہ

ایران کے سرکاری میڈیا نے رپورٹ کیا ہے کہ جمعرات سے ملک میں فلائٹ آپریشن بحال ہو گیا ہے۔

خبر رساں ادارے 'رائٹرز' کے مطابق ایرانی سرکاری میڈیا نے سول ایوی ایشن کا حوالہ دے کر رپورٹ کیا ہے کہ فلائٹ آپریشن پر عائد پابندی اٹھا لی گئی ہے۔

تہران نے اسرائیل پر میزائل حملے کے بعد منگل کو ملک بھر میں فلائٹ آپریشن معطل کر دیا تھا۔

اسرائیل کے حملوں کے بعد لبنان کے جنوبی علاقوں میں لوگ بے گھر اور نقل مکانی پر مجبور ہیں۔ ان میں سے بڑی تعداد میں خاندان دارالحکومت بیروت پہنچے ہیں۔ بیروت میں جہاں سرکاری عمارتوں میں بے گھر افراد پناہ لے رہے ہیں وہیں مشہور کلب ’اسکائی بار‘ نے بھی متاثرین کے لیے اپنے دروازے کھول دیے ہیں۔ اس کلب میں کئی خاندان پناہ لے رہے ہیں جن کے ہمراہ چھوٹے بچے بھی ہیں۔ اسکائی بار کلب نائٹ لائف کے لیے مشہور ہے جہاں ڈانس پارٹیز اور دیگر تقریبات منعقد ہوتی تھیں۔

یمن کے حوثی باغیوں نے اسرائیل کے معاشی حب تل ابیب کو ڈرونز سے نشانہ بنانے کا دعویٰ کیا ہے۔

خبر رساں ادارے 'رائٹرز' کے مطابق حوثی فوج کے ترجمان یحیٰ ساری نے جمعرات کو جاری ایک بیان میں کہا ہے کہ ڈرون آپریشن نے کامیابی سے اپنے مقاصد حاصل کر لیے ہیں اور دشمن کو نہ تو ڈرونز کا پتا چلا اور نہ ہی کوئی ڈرون مار گرایا گیا ہے۔

تل ابیب پر ڈرون حملے میں ہونے والے نقصانات کی تفصیلات سامنے نہیں آ سکی ہیں۔ البتہ 'ٹائمز آف اسرائیل' کے مطابق اسرائیلی ڈیفنس فورسز نے ایک بیان میں ڈرون حملے کی تصدیق کرتے ہوئے کہا ہے کہ تل ابیب کی جانب دو ڈرونز آئے تھے جن میں سے ایک مار گرایا جب کہ دوسرا کھلے علاقے میں گر کر تباہ ہو گیا ہے۔

امریکہ کی ریاست مشی گن سے تعلق رکھنے والے شہری کامل احمد جواد لبنان میں اسرائیل کی فضائی کارروائی میں ہلاک ہو گئے ہیں۔

خبر رساں ادارے 'رائٹرز' کے مطابق متاثرہ شخص کی بیٹی نادن جواد نے والد کی ہلاکت کی تصدیق کی ہے اور ایک بیان میں دعویٰ کیا ہے کہ ان کے والد اسرائیلی حملے میں منگل کو اس وقت ہلاک ہوئے جب وہ معصوم لوگوں کی زندگیاں بچانے کی کوشش کر رہے تھے۔

وائٹ ہاؤس کے ترجمان نے ایک بیان میں کہا ہے کہ ہمیں کامل احمد جواد کی موت پر بے حد افسوس ہے اور ہماری ہمدردیاں متاثرہ خاندان اور ان کے دوستوں کے ساتھ ہیں۔

بیان میں مزید کہا گیا ہے کہ کامل احمد کی موت ایک المیہ ہے، جس طرح لبنان میں متعدد شہریوں کی ہلاکت ہوئی ہے۔

امریکہ کی سیاسی جماعت ڈیموکریٹک پارٹی کی ایوانِ نمائندگان کی رکن راشدہ طلیب کے دفتر نے بھی بدھ کو جاری ایک بیان میں کہا ہے کہ وہ متاثرہ شخص کے خاندان سے رابطے میں ہیں۔