سابق وزیرِ اعظم عمران خان انسدادِ دہشت گردی کی عدالت میں پیش
سابق وزیرِ اعظم عمران خان ایک جلسے میں خاتون جج کو دھمکیاں دینے کے مقدمے میں ضمانت کے لیے انسدادِ دہشت گردی کی عدالت میں پیش ہو گئے ہیں۔
عمران خان سخت سیکیورٹی میں بنی گالہ سے عدالت پہنچے تو اس موقع پر عدالت کے باہر تحریکِ انصاف کے کارکنوں کی بڑی تعداد موجود تھی۔
انسدادِ دہشت گردی کی عدالت کے جج راجا جواد عباس عمران خان کے خلاف دہشت گردی کے مقدمے کی سماعت کریں گے جب کہ ان کے وکیل فیصل چوہدری اور علی بخاری کمرۂ عدالت میں موجود ہیں۔
سابق وزیرِ اعظم عدالت میں ضمانت قبل از وقت گرفتاری کی درخواست دیں گے۔
تحریکِ انصاف کے کارکن عدالت کے باہر جمع ہونا شروع
عمران خان کی انسدادِ دہشت گردی کی عدالت میں پیشی سے قبل تحریکِ انصاف کے کارکن اپنے قائد سے اظہارِ یکجہتی کے لیے عدالت کے باہر جمع ہونا شروع ہو گئے ہیں۔
عمران خان کی کچھ دیر بعد آمد متوقع ہیں جن کے استقبال کے لیے درجنوں کارکن انسدادِ دہشت گردی کی عدالت کے باہر جمع ہیں جب کہ پولیس اہلکار بھی الرٹ کھڑے ہیں۔
فیڈرل جوڈیشل کمپلیکس کے اطراف سڑکیں بند
عمران خان کی انسدادِ دہشت گردی کی عدالت میں پیشی سے قبل حکام نے فیڈرل جوڈیشل کمپلیکس کے اطراف کی سڑکوں کو بند کر دیا ہے۔
کورٹ رپورٹر اویس یوسف زئی کے مطابق چیئرمین تحریکِ انصاف کی عدالت آمد کے سلسلے میں حفاظتی انتظامات کے لیے پولیس کی اضافی نفری تعینات ہے جب کہ میڈیا کو جوڈیشل کمپلیکس داخلے سے روک دیا گیا ہے۔
عمران خان ضمانت قبل از گرفتاری کی درخواست دائر کریں گے
سابق وزیرِ اعظم عمران خان ایڈیشنل سیشن جج زیبا چوہدری کو دھمکی دینے کے مقدمے میں آج انسدادِ دہشت گردی کی عدالت میں پیش ہوں گے۔
عمران خان کے خلاف اسلام آباد کے ایک تھانے میں خاتون جج کو دھمکی دینے کے الزام میں دہشت گردی کا مقدمہ درج ہے۔
سابق وزیرِ اعظم نے مذکورہ مقدمے میں ضمانت کے لیے پیر کو اسلام آباد ہائی کورٹ سے رجوع کیا تھا۔ تاہم ہائی کورٹ نے درخواست گزار کو انسدادِ دہشت گردی کی عدالت سے رابطہ کرنے کی ہدایت کی تھی۔
چیئرمین تحریکِ انصاف عمران خان کچھ دیر بعد انسدادِ دہشت گردی کی عدالت پہنچیں گے اور عدالت سے ضمانت قبل از گرفتاری کی درخواست کریں گے۔