دہشت گردی کا مقدمہ خارج کرانے کے لیے عمران خان کی اسلام آباد ہائی کورٹ میں درخواست
پاکستان تحریکِ انصاف کے چیئرمین عمران خان نے اپنے خلاف دہشت گردی کا مقدمہ خارج کرانے کے لیے اسلام آباد ہائی کورٹ سے رُجوع کر لیا ہے۔
تحریکِ انصاف کے سربراہ نے درخواست میں مؤقف اختیار کیا ہے کہ اُن کے خلاف مقدمے کو غیر قانونی قرار دے کر خارج کیا جائے۔
خیال رہے کہ عمران خان کے خلاف ریاست کی مدعیت میں انسدادِ دہشت گردی کی دفعات کے تحت تھانہ مارگلہ میں مقدمہ درج کیا گیا تھا۔ مقدمے میں کہا گیا تھا کہ عمران خان نے اسلام آباد میں ریلی کے دوران اسلام آباد پولیس کے حکام اور خاتون مجسٹریٹ کو دھمکیاں دیں۔
مقدمے میں کہا گیا تھا کہ عمران خان نے سرکاری افسران کو کام سے روکنے اور اُنہیں دھمکیاں دے کر دہشت زدہ کرنے کی کوشش کی۔
اسلام آباد ہائی کورٹ: عمران خان کی تقاریر پر عائد پابندی کا حکم نامہ معطل
پاکستان تحریکِ انصاف (پی ٹی آئی) کے چیئرمین اور سابق وزیرِ اعظم عمران خان کی تقاریر براہِ راست ٹی وی چینلز پر نشر کرنے پر پاکستان الیکٹرانک میڈیا ریگولیٹری اتھارٹی (پیمرا) کی پابندی حکم نامہ اسلام آباد ہائی کورٹ نے معطل کر دیا ہے۔
مقامی میڈیا کے مطابق اسلام آباد ہائی کورٹ میں عمران خان کی تقاریر نشر کرنے پر پیمرا کی پابندی کےخلاف درخواست دائر کی گئی تھی۔ پیر کو اس درخواست کی سماعت اسلام آباد ہائی کورٹ کے چیف جسٹس اطہر من اللہ نے کی جب کہ عمران خان کی جانب سے بیرسٹر علی ظفر عدالت کے روبرو پیش ہوئے۔
بیرسٹر علی ظفر نے عدالت میں دلائل دیے کیے کہ پاکستان اس وقت سیلاب سے متاثر ہے جب کہ عمران خان سیلاب متاثرین کی مدد کے لیے امداد جمع کرنا چاہتے ہیں تاہم پیمرا نے ان کی تقاریر براہِ راست نشر کرنے پر پابندی عائد کی ہوئی ہے۔
چیف جسٹس اطہر من اللہ نے اس تقریر کا مسودہ بھی طلب کیا جس کے بعد عمران خان کی تقاریر براہِ راست نشر کرنے پر پابندی عائد ہوئی تھی۔ چیف جسٹس نے کہا کہ آزادیٴ اظہارِ رائے ضروری ہے البتہ اس کی بھی کچھ حدود ہیں۔
بعد ازاں اسلام آباد ہائی کورٹ نے پیمرا کا حکم نامہ معطل کر دیا اور پیمرا کے ساتھ ساتھ اٹارنی جنرل کو بھی نوٹس جاری کر دیا۔
دفعہ 144 کیس میں عمران خان کی سات ستمبر تک عبوری ضمانت منظور
تحریکِ انصاف کے چیئرمین عمران خان کی دفعہ 144 کیس میں بھی عبوری ضمانت سات ستمبر تک منظور کر لی گئی ہے۔
عمران خان پر دفعہ 144 کی خلاف ورزی پر اسلام آباد کے تھانہ آبپارہ میں مقدمہ درج کیا گیا تھا۔
عمران خان کے انسدادِ دہشت گردی عدالت میں پیشی کے مناظر