سال 2021 کے اختتام پر دنیا میں کرونا کا نیا ویریئنٹ 'اومیکرون' سامنے آنے کے بعد ایک مرتبہ پھر پابندیاں لگنا شروع ہو گئی ہیں جس کے بعد انٹرٹینمنٹ انڈسٹری ایک بار پھر تذبذب کا شکار ہے۔
اومیکرون ویریئنٹ کے کیسز میں اضافے کے بعد ہالی وڈ اور متعدد بالی وڈ فلموں کی ریلیز کو منسوخ کر دیا گیا ہے۔
خبر رساں ادارے 'رائٹرز' کے مطابق امریکی میڈیا کمپنی 'سونی پکچرز' نے پیر کو مارول سپر ہیرو فلم 'موربیئس' کی ریلیز منسوخ کرتے ہوئے نئی تاریخ کا اعلان کیا ہے۔
'سونی پکچرز' نے اپنے بیان میں کہا کہ جنوری میں ریلیز ہونے والی فلم 'موربیئس' اب یکم اپریل 2022 کو ریلیز ہو گی۔ فلم میں امریکی اداکار جیرڈ لیٹو، کوری جانسن اور اداکارہ ایڈریا آر ہونا سمیت دیگر نے اداکاری کے جوہر دکھائے ہیں۔
'موربیئس' کو 28 جنوری 2022 کو سنیما گھروں کی زینت بننا تھا۔ اس سے قبل بھی کرونا کی وجہ سے متعدد بار یہ فلم تاخیر کا شکار ہوئی ہے۔
نئے سال کا آغاز ہوتے ہی بالی وڈ فلم 'آر آر آر' کی ریلیز منسوخ کر دی گئی تھی۔
'آر آر آر' فلم کے انسٹاگرام اکاؤنٹ سے یکم جنوری کو بیان جاری کیا گیا کہ بھارت کی متعدد ریاستوں میں سنیما گھر بند ہیں جس کی وجہ سے انہیں فلم کی ریلیز منسوخ کرنی پڑ رہی ہے۔
تاہم فلم کی ریلیز کی نئی تاریخ کا اعلان نہیں کیا گیا۔ 'آر آر آر' اس سے قبل سات جنوری کو سنیما گھروں کی زینت بننا تھی۔
آئی این ڈی بی کے مطابق 'آر آر آر' کی کہانی دو افسانوی انقلابیوں کے گرد گھومتی ہے جو 1920 کی دہائی میں اپنے ملک کے لیے لڑنے کی خاطر اپنے گھر سے دور کا سفر طے کرتے ہیں۔
فلم میں اداکار رام چرن، عالیہ بھٹ، اجے دیوگن سمیت دیگر نے اداکاری کے جوہر دکھائے ہیں۔
اس سے قبل بھارت میں کرونا کی صورتِ حال کو مدِ نظر رکھتے ہوئے اداکار شاہد کپور کی فلم 'جرسی' بھی سنیما گھروں کی زینت نہیں بن سکی تھی۔
فلم کو نئے سال کے موقع یعنی 31 دسمبر کو ریلیز ہونا تھا لیکن چند روز قبل ہی اسے منسوخ کرنے کا اعلان کیا گیا۔
البتہ 'جرسی' کی ریلیز کی نئی تاریخ کا اعلان نہیں کیا گیا۔
آئی این ڈی بی کے مطابق ڈرامہ اور اسپورٹس پر مبنی فلم 'جرسی' کی کہانی ایک ایسے کرکٹر کے گرد گھومتی ہے جو کرکٹ کی دنیا کو خیرباد کہہ دیتا ہے اور پھر وہ اپنے بیٹے کے خواب اور اپنی صلاحیتوں کو ثابت کرنے کے لیے 36 برس کی عمر میں دوبارہ اپنے کریئر کو بحال کرنے کا فیصلہ کرتا ہے۔
فلم میں شاہد کپور کے مدِ مقابل اداکارہ مرونال ٹھاکر اداکاری کے جوہر دکھائیں گی جب کہ فلم کی دیگر کاسٹ میں پنکج کپور، پلک سنگھ، کرن مشرا اور دیگر اداکاری کریں گے۔
