وزیرِ اعظم شہباز شریف آج سیلاب سے متاثرہ سوات اور لوئر کوہستان کا دورہ کریں گے
وزیرِ اعظم شہباز شریف آج سیلاب سے متاثرہ صوبہ خیبر پختونخوا کے اضلاع سوات اور لوئر کوہستان کا دورہ کریں گے۔
وزیرِ اعظم آفس سے جاری ایک بیان کے مطابق وزیرِ اعظم ضلع سوات میں کالام اور کانجو جب کہ ضلع لوئر کوہستان کے علاقے پتن جائیں گے۔
عالمی اداروں نے بھارت سے خوراک کی درآمد کی اجازت کے لیے حکومت سے رابطہ کیا ہے: مفتاح اسماعیل
وزیرِ خزانہ مفتاح اسماعیل کا کہنا ہے کہ ایک سے زائد عالمی اداروں نے بھارت سے اشیا خور و نوش کی بذریعہ سڑک درآمد کی اجازت کے لیے حکومت سے رابطہ کیا ہے۔
مفتاح اسماعیل نے ایک ٹویٹ میں کہا ہے کہ حکومت اپنے اتحادیوں سمیت اسٹیک ہولڈرز سے مشاورت کے بعد فیصلہ کرے گی کہ بھارت سے اشیا کی درآمد کی اجازت دی جائے یا نہیں۔
واضح رہے کہ حالیہ بارشوں اور سیلاب سے پاکستان میں پیاز، ٹماٹر سمیت دیگر کئی اہم فصلیں بری طرح متاثر ہوئی ہیں جس کے پیشِ نظر ان اشیا کے بحران کا خدشہ پیدا ہو گیا ہے۔
بھارت سے تجارت بحال کرنا کشمیر کاز پر سمجھوتے کے مترادف ہو گا: علی محمد خان
پاکستان تحریکِ انصاف کے رہنما علی محمد خان کا کہنا ہے کہ کوئی بھی بہانہ بنا کر حکومت کا بھارت سے تجارت بحال کرنا کشمیر کاز پر سمجھوتے کے مترادف ہو گا۔
انہوں نے ایک ٹویٹ میں کہا کہ بھارت سے تجارت قوم کو کسی بھی صورت قبول نہیں۔
ان کا یہ بیان وزیرِ خزانہ مفتاح اسماعیل کے اس بیان کے بعد سامنے آیا ہے جس میں ان کا کہنا تھا کہ سیلاب کے باعث اجناس کے بحران کے پیشِ نظر ایک سے زائد عالمی تنظیموں نے بھارت سے اشیا کی پاکستان درآمد کے لیے حکومت سے اجازت طلب کی ہے۔
علی محمد خان کا مزید کہنا تھا کہ بھارت پہلے کشمیر کی پانچ اگست سے پہلے والی آئینی حیثیت بحال کرے پھر آگے بات بڑھے گی۔
صدر عارف علوی کا سیلاب سے متاثرہ ضلع نوشہرہ کا دورہ
صدرِ پاکستان ڈاکٹر عارف علوی نے سیلاب سے متاثرہ خیبر پختونخوا کے ضلع نوشہرہ کا دورہ کیا جہاں حکام نے انہیں مردان پل پر سیلاب کی صورتِ حال سے متعلق بریفنگ دی۔
صدر مملکت نے صوبائی حکومت کو ہدایت کی کہ سیلاب متاثرین کی بحالی اور ان کے گھروں کی دوبارہ تعمیر کے لیے اقدامات کی رفتار مزید تیز کی جائے۔