فرانس کے صدر کا پاکستان کے وزیرِ اعظم کو فون

فرانس کے صدر ایمانوئل میخواں نے سیلاب سے متاثرہ پاکستان کے وزیرِ اعظم شہباز شریف کا ٹیلی فون کال کی ہے۔

ایمانوئل میخواں کا سوشل میڈیا پر ایک بیان میں کہنا تھا کہ پاکستان میں عوام ایک بدترین سیلاب کا سامنا کر رہے ہیں۔

ان کا مزید کہنا تھا کہ سیلاب کے سبب بے شمار لوگ لاپتا ہوئے ہیں اور ایک آبادی کا ایک بڑا حصہ متاثر ہوا ہے۔

انہوں نے عزم ظاہر کیا کہ فرانس پاکستان کی مدد کے لیے تیار ہے۔

دوسری جانب پاکستان کے وزیرِ اعظم شہباز شریف نے کہا کہ وہ فرانس کے صدر کے شکر گزار ہیں کہ انہوں نے پاکستان کے عوام سے اظہار یکجہتی کیا ہے اور مدد کی پیش کش کی ہے۔

وزیرِ اعظم شہباز شریف کے سیلاب زدہ علاقوں کا دورہ

پاکستان کے وزیرِ اعظم شہباز شریف مسلسل سیلاب زدہ علاقوں کے دورے کر رہے ہیں اور پیر کو بھی انہوں نے خیبر پختونخوا کے مختلف علاقوں کو دورہ کیا ہے۔

وزیرِاعظم آفس سے جاری بیان کے مطابق سیلاب زدہ علاقوں میں نقصانات کا جائزہ اور متاثرین سے ملاقات کے لیے شہباز شریف نوشہرہ گئے ہیں۔

واضح رہے کہ اتوار کو شہباز شریف نے بلوچستان کے علاقے جعفر آباد کا دورہ کیا تھا۔

وزیرِ اعظم کو ان دوروں کے دوران سیلاب کی صورتِ حال اور امدادی کارروائیوں پر تفصیلی بریفنگ بھی دی جا رہی ہے۔

وفاقی حکومت کی جانب سے وزیرِاعظم سیلاب متاثرین میں امدادی چیکس بھی تقسیم کر رہے ہیں۔

خیبر پختونخوا کے دورے میں شہباز شریف نے مردان پل پر دریائے کابل میں سیلابی صورتِ حال کا بھی جائزہ لیا۔

شیخ رشید کی وزیرِ اعظم شہباز شریف پر تنقید

پاکستان کے سابق وزیرِ داخلہ اور عوامی مسلم لیگ کے سربراہ شیخ رشید احمد نے کہا ہے کہ پاکستان میں ہر 10 برس بعد سیلاب آتا ہے لیکن حکومت اس سیلاب سے نمٹنے کی استعداد نہیں رکھتی۔

سوشل میڈیا پر ایک بیان میں انہوں نے کہا کہ دنیا نے سیلابی پانی کو کنٹرول کرنے کے لیے ڈیم بنائے جب کہ پاکستان میں غریبوں کی بستیوں کو ڈیم بنا دیا جاتا ہے۔

واضح رہے کہ چار ماہ قبل تک وفاق میں تحریکِ انصاف کی حکومت تھی جس میں چار سال تک شیخ رشید احمد وفاقی کابینہ کا حصہ رہے تھے اور جب حکومت ختم ہوئی تو ان کے پاس وزارتِ داخلہ کا قلم دان تھا۔

شیخ رشید احمد نے شہباز شریف پر تنقید کرتے ہوئے کہا کہ وزیرِ اعظم سیکیورٹی کے ہمراہ روزانہ بچوں کے ساتھ اسٹائل بنا کر تصاویر بنواتے ہیں جب کہ متاثرہ عوام کے لیے اسکول اور شاہراہیں ہیں اور ٹینٹ نایاب ہیں۔

قدرتی آفات سے نمٹنے کے ادارے کا ذکر کرتے ہوئے ان کا کہنا تھا کہ

نیشنل ڈزاسٹر مینجمنٹ اتھارٹی خود مسائل کی شکار ہے، وہ کیا عوام کے مسائل حل کرے گی؟

یو اے ای کی سیلاب متاثرین کے لیے امداد

متحدہ عرب امارات (یو اے ای) نے پاکستان کے سیلاب زدہ علاقوں میں متاثرین کی مدد کے لیے مزید امداد فراہم کر دی ہے۔

اسلام آباد میں متحدہ عرب امارات کے سفیر حمد عبید الزعابی نے امدادی سامان پاکستان کے حکام کےحوالے کیا۔ اس موقع پر وفاقی وزیر احسن اقبال بھی موجود تھے۔

یو اے ای سے امدادی سامان خصوصی طیارے کے ذریعے لایا گیا۔ امارات کے اسلام آباد میں سفارت خانے کے بیان کے مطابق ہنگامی امداد میں كئی ٹن کھانے پینے کی اشیا، ادویات اور متاثرین کی پناہ کے لیے خیمے شامل ہیں۔

امارات کے سفیر حمد عبید الزعابی کا کہنا تھا کہ یو اے ای سیلاب اور بارشوں کی موجودہ صورتِ حال میں برادر ملک اسلامی جمہوریہ پاکستان اور اس کے عوام کے ساتھ کھڑا ہے۔