فلسطینوں نے پیر کی صبح سے شمالی غزہ کی طرف واپسی شروع کر دی ہے۔ تقریباً ایک برس سے وسطی اور جنوبی غزہ کی پناہ گاہوں میں رہنے والے فلسطینی خاندان گدھا گاڑیوں اور رکشوں میں سامان لاد کر اپنے گھروں کی طرف لوٹ رہے ہیں۔ اسرائیلی وزیرِاعظم بینجمن نیتن یاہو نے اتوار کو بیان میں کہا تھا کہ فلسطینی پیر سے شمالی غزہ کی طرف لوٹ سکتے ہیں۔ اس سے قبل وسطی اور جنوبی غزہ میں موجود فلسطینیوں کو شمالی غزہ میں واپسی کے لیے انتظار کا سامنا کرنا پڑ رہا تھا جس کی وجہ حماس کی تحویل میں موجود ایک اسرائیلی یرغمال خاتون کی رہائی میں تاخیر تھی۔ جنگ بندی معاہدے میں ثالث کا کردار ادا کرنے والے قطر نے پیر کو بتایا ہے کہ حماس اربیل یہود کو جمعے سے قبل رہا کر دے گی۔ غزہ جنگ کا آغاز سات اکتوبر 2023 کو اس وقت ہوا تھا جب فلسطینی عسکری تنظیم حماس کے جنگجوؤں نے جنوبی اسرائیل پر دہشت گرد حملہ کیا تھا۔ امریکہ اور بعض یورپی ممالک حماس کو دہشت گرد قرار دے چکی ہے۔ اسرائیلی حکام کے مطابق اس حملے میں 1200 افراد ہلاک اور 250 کو یرغمال بنایا گیا تھا۔ اسرائیل سمجھتا ہے کہ غزہ میں اب بھی موجود لگ بھگ 90 یرغمالوں میں سے ایک تہائی کی موت ہو چکی ہے۔ حملے کے جواب میں اسرائیل کی جانب سے شروع کی گئی جنگ میں حماس کے زیرِ انتظام غزہ کی وزارتِ صحت کے مطابق 47 ہزار سے زائد فلسطینی ہلاک ہو چکے ہیں۔
