اسکاٹش فٹ بال کلب سیلٹک کے مداحوں کے ایک گروپ 'گرین بریگیڈ' نے بدھ کی شب یوئیفا چیمپئنز لیگ کے ایک میچ کے دوران اسٹیڈیم میں فلسطینی جھنڈے لہرا دیے۔ سیلٹک فٹ بال کلب نے میچ سے قبل ہی مداحوں، کھلاڑیوں اور کوچنگ اسٹاف کو ہدایت کی تھی کہ وہ اسرائیل حماس تنازع کے متاثرین کے ساتھ اظہارِ یکجہتی کے لیے بازو پر سیاہ پٹی باندھ سکتے ہیں۔ بدھ کی شب سیلٹک کلب اور ہسپانوی کلب اٹلیٹیکو میڈرڈ کے درمیان میچ شروع ہوا تو 'گرین بریگیڈ' نے فلسطینیوں سے اظہارِ یکجہتی کے طور پر فلسطینی پرچم لہرائے۔ سیلٹک فٹ بال کلب نے میچ سے قبل واضح کیا تھا کہ کسی بھی قسم کے بینرز اور جھنڈے اسٹیڈیم لانے کی اجازت نہیں ہے۔ گرین بریگیڈ گروپ کی جانب سے حالیہ میچز میں فلسطینی جھنڈے لہرانے کی وجہ سے کلب نے پہلے ہی ملک سے باہر میچز میں شرکت پر پابندی عائد کر رکھی ہے۔
