پنجاب میں وزارتِ اعلٰی کے لیے میاں اسلم اقبال پی ٹی آئی کے اُمیدوار

پاکستان تحریکِ انصاف کے رہنما بیرسٹر گوہر نے کہا ہے کہ میاں اسلم اقبال پنجاب میں وزارتِ اعلٰی کے اُمیدوار ہوں گے۔

اڈیالہ جیل کے باہر میڈیا سے گفتگو کرتے ہوئے بیرسٹر گوہر کا کہنا تھا کہ تحریکِ انصاف انتخابات میں دھاندلی کے خلاف ہفتے کو پرامن احتجاج کرے گی۔

بیرسٹر گوہر کا کہنا تھا کہ اڈیالہ جیل میں عمران خان کے ساتھ وفاق اور خیبرپختونخوا میں حکومت سازی پر بات ہوئی ہے۔

الیکشن کمیشن نے استحکامِ پاکستان پارٹی کے رہنما عون چوہدری کی انتخابی میں کامیابی کا نوٹی فکیشن واپس لے لیا ہے۔

وائس آف امریکہ کے نمائندے عاصم علی رانا کے مطابق اسلام آباد ہائی کورٹ کے چیف جسٹس عامر فاروق نے پی ٹی آئی کے حمایت یافتہ امیدوار سلمان اکرم راجا کی درخواست پر سماعت کی۔

اس دوران الیکشن کمیشن کے ڈائریکٹر جنرل لاء نے عدالت کو بتایا کہ این اے 128 لاہور سے متعلق 12 فروری کو جاری کیا گیا عون چوہدری کی کامیابی کا نوٹی فکیشن واپس لے رہے ہیں۔

چیف جسٹس نے ریمارکس دیے کہ سلمان اکرم راجہ کی درخواست الیکشن کمیشن کے پاس زیرِ التوا ہے، لہٰذا آپ وہاں جائیں۔ عدالت نے سلمان اکرم راجہ کے وکیل کو کیس الیکشن کمیشن کے سامنے رکھنے کی ہدایت کردی۔

پاکستان تحریک انصاف پنجاب کے صدر حماد اظہر نے کارکنوں اور انتخابی امیدواروں کو پرامن احتجاج کی تیاری کی ہدایت کردی ہے۔

سوشل میڈیا پلیٹ فارم 'ایکس' پر ایک بیان میں انہوں نے کہا کہ پنجاب کے تمام امیدوار اور کارکنان ہنگامی بنیادوں پر تیاری شروع کریں۔

حماد اظہر کے مطابق احتجاج کے دن اور مقام کا کسی بھی وقت شارٹ نوٹس پر اعلان ہو گا۔

پاکستان کے دفتر خارجہ نے کہا ہے کہ انتخابی عمل پاکستان کا اندرونی خود مختاری کا معاملہ ہے اور انتخابات کے حوالے سے مبصرین کی جانب سے سامنے آ نے والے بیانات حقیقت پر مبنی نہیں ہیں۔

ترجمان دفترِ خارجہ ممتاز زہرا بلوچ نے آٹھ فروری کو ہونے والے عام انتخابات کے بارے میں عالمی سطح پر سامنے آنے والے ردعمل کے بارے میں کہا کہ کروڑں پاکستانی ووٹروں نے عام انتخابات میں اپنے دوٹ کا حق استعمال کیا تاہم مبصرین کی جانب سے جو بیانات سامنے آئے ہیں ان میں بہت سے بیانات حقیقت پر مبنی نہیں ہیں۔

پاکستان کے دفتر خارجہ کا یہ بیان ایک ایسے وقت سامنے آیا ہے جب امریکہ نے ایک بار پھر کہا ہے کہ آٹھ فروری کے انتخابات میں دھاندلی اور بے ضابطگیوں کے الزامات کی تحقیقات ہونی چاہیے،

امریکی محکمۂ خارجہ کے ترجمان میتھو ملر نے بدھ کو معمول کی بریفنگ کے دوران کہا تھا کہ "ہم نہ صرف پاکستان میں بلکہ دنیا بھر میں انتخابی بے ضابطگیوں کی تحقیقات کا مطالبہ کرتے ہیں ۔"

امریکہ کے علاوہ یورپی یونین اور اقوام متحدہ اور انسانی حقوق کی تنطیموں بشمول ہیومن رائٹس واچ کی طرف سے بھی پاکستانی انتخابات میں ہونے والی مبینہ بے ضابطگیوں پر تحفظات کا اظہار کرتے ہوئے ان کی شفاف تحقیقات کا مطالبہ کیا تھا۔

دوسری جانب پاکستانی حکام اور الیکشن کمیشن نے بارہا یہ کہا ہے کہ پاکستان میں انتخابی عمل شفاف انداز میں منعقد ہوا ہے۔

قبل ازیں امریکہ اور یورپی یونین سمیت بعض عالمی رہنماؤں نے پاکستان میں پولنگ کے روز انٹرنیٹ اور موبائل فون سروس معطل ہونے پر تشویش کا اظہار کیا تھا۔ حکومتِ پاکستان کا مؤقف تھا کہ انٹرنیٹ کی بندش دہشت گردی سے بچنے کے لیے تھی۔