پاکستان میں انتخابات کے ابتدائی نتائج: شہباز شریف قومی اور صوبائی نشستوں پر کامیاب

پاکستان تحریکِ انصاف نے پولنگ کا وقت بڑھانے کے لیے الیکشن کمیشن میں باضابطہ درخواست جمع کرانے کا فیصلہ کیا ہے۔

پی ٹی آئی کے جاری کردہ بیان میں کہا گیا ہے کہ الیکشن عملے کی جانب سے پولنگ کے عمل کو سست روی کا شکار کرنے کی بے پناہ شکایات موصول ہوئی ہیں۔ بڑی تعداد میں لوگ پولنگ اسٹیشنز کے باہر اپنے ووٹ کا حق استعمال کرنے کے لیے موجود ہیں۔

بیان میں مطالبہ کیا گیا ہے کہ الیکشن کمیشن آف پاکستان کم از کم ایک گھنٹے کی توسیع کرتے ہوئے پولنگ چھ بجے تک جاری رکھنے کا اعلان کرے۔

پاکستان میں عام انتخابات کے لیے پولنگ کا وقت ختم ہو گیا ہے۔ الیکشن کمیشن آف پاکستان کے مطابق میڈیا کو چھ بجے سے قبل انتخابی نتائج کا اعلان کرنے کی اجازت نہیں ہو گی۔

چیف الیکشن کمشنر سکندر سلطان راجہ کا میڈیا سے گفتگو میں کہنا تھا کہ ریٹرننگ آفیسر زیادہ سے زیادہ رات دو بجے تک نتائج دینے کا پابند ہے۔

اُن کا کہنا تھا کہ یہ ضروری نہیں ہے کہ نتائج بھی رات دو بجے ہی جاری کیے جائیں، ہو سکتا ہے کہ رات 11 بجے ہی نتائج آ جائیں۔