پاکستان میں انتخابات کے ابتدائی نتائج: شہباز شریف قومی اور صوبائی نشستوں پر کامیاب

پاکستان پیپلز پارٹی (پی پی پی) نے ملک میں الیکشن کے روز انٹرنیٹ اور موبائل فون سروسز کی بندش کے خلاف الیکشن کمیشن میں پٹیشن دائر کر دی ہے۔

پیپلز پارٹی کی نائب صدر سینیٹر شیری رحمان نے الیکشن کمیشن لاہور میں پٹیشن جمع کرا دی ہے۔ اس موقع پر ان کا کہنا تھا کہ آج الیکشن کا دن ہے ۔موبائل فون اور انٹرنیٹ سروز بند کرنا جمہوریت اور انتخابی عمل کی نفی ہے۔

شیری رحمان نے کہا کہ پارٹی اور امیدوار کو پولنگ ایجنٹس سے رابطہ رکھنا ہوتا ہے اور موبائل فون اور انٹرنیٹ سروسز کی بندش سے رابطوں میں مشکلات کا سامنا ہے۔

پاکستان کے صدر ڈاکٹر عارف علوی نے کہا ہے کہ ووٹ ڈالنا ہر فرد کی اسلامی، آئینی اور شہری ذمہ داری ہے۔ آج پاکستان کو آپ کی رائے کی اتنی ضرورت ہے جتنی پہلے کبھی نہیں تھی۔

کراچی میں اپنا ووٹ کاسٹ کرنے کے بعد سوشل میڈیا پر ایک بیان میں صدر عارف علوی نے ایک بیان میں کہا کہ پاکستان نے قومی اور صوبائی اسمبلیوں میں نمائندے منتخب کرنے کے لیے آپ کے ووٹ کے ذریعے آپ کی رائے مانگی ہے۔ آپ سب سے درخواست ہے کہ باہر نکلیں اور اپنا ووٹ کا حق استعمال کریں۔

امریکی رکن کانگریس بریڈ شرمین کا کہنا ہے کہ کوئی بھی انتخاب مکمل طور پر بہترین نہیں ہوتا۔ پاکستان کی سیاست پر گہری نظر رکھنے والے بریڈ شرمن نے وائس آف امریکہ کو ایک انٹرویو میں کہا کہ امریکہ دنیا بھر میں جمہوریت کا ساتھ دے رہا ہے اور وہ خود بھی آزادانہ انتخابات کی حمایت کرتے ہیں۔

چیف الیکشن کمشنر سکندر سلطان راجہ کا کہنا ہے کہ کمیشن کا اپنا انٹرنیٹ سسٹم فعال ہے اور امن و امان کی صورتِ حال ایسی ہے کہ وہ انٹرنیٹ کھولنے کی ہدایت نہیں دے سکتے۔