قومی اسمبلی کے اجلاس سے قبل متحدہ اپوزیشن جماعتوں کا اجلاس
قومی اسمبلی کا اجلاس اب سے کچھ دیر بعد شروع ہو گا جس میں وزیرِ اعظم پر عدم اعتمادِ کی تحریک اجلاس کے ایجنڈے پر سرِ فہرست ہے۔
اسمبلی اجلاس سے قبل متحدہ اپوزیشن جماعتوں نے اپنے اجلاس کے دوران حکمتِ عملی طے کی۔
شاہ زین بگٹی کی اپوزیشن کے اجلاس میں انٹری
جمہوری وطن پارٹی کے سربراہ شاہ زین بگٹی بھی اپوزیشن جماعتوں کی پارلیمانی پارٹی کے اجلاس میں پہنچ گئے۔
اپوزیشن ارکان اور قیادت نے کھڑے ہو کر اور تالیاں بجا کر شاہ زین بگٹی کا استقبال کیا۔
شاہ زین بگٹی نے اتوار کو چیئرمین پیپلز پارٹی بلاول بھٹو زرداری سے ملاقات کے بعد حکومت سے علیحدگی کا اعلان کیا تھا۔
وزیرِ اعظم کو خطرہ تھا تو قومی سلامتی کی کمیٹی کے سامنے معاملہ کیوں نہیں لائے: شیریں رحمٰن
پاکستان پیپلز پارٹی کی رہنما سینیٹر شیریں رحمٰن نے کہا ہے کہ اگر عمران خان کو حکومت سے متعلق کوئی خطرہ تھا تو وہ یہ معاملہ پارلیمنٹ کی قومی سلامتی کی کمیٹی کے سامنے کیوں نہیں لے کر آئے۔
شیریں رحمٰن نے اپنے ایک ٹوئٹ میں کہا کہ خطرات کے معاملات اٹھانے کے کئی راستے ہیں اور جلسہ ان میں سے نہیں ہے۔
ڈپٹی اسپیکر کی زیرِ صدارت قومی اسمبلی کا اجلاس شروع
ڈپٹی اسپیکر قاسم سوری کی زیرِ صدارت قومی اسمبلی کا اجلاس شروع ہو گیا ہے۔ آج ہونے والے اجلاس میں وزیرِ اعظم کے خلاف عدم اعتماد کی تحریک پیش کیے جانے کا امکان ہے۔
اجلاس میں حکومتی اتحادیوں اور منحرف ارکان موجود نہیں ہیں جب کہ اپوزیشن کے ارکان کی بڑی تعداد ایوان میں موجود ہے۔