تاج محل چھ ماہ بعد کھل گیا

حکام کا کہنا ہے کہ روزانہ صرف پانچ ہزار سیاحوں کو تاج محل دیکھنے کی اجازت ہو گی اور اُنہیں سماجی دوری اور ہینڈ سینیٹائز کرنا ہوں گے۔
 

بھارت میں مارچ میں اعلان کردہ سخت لاک ڈاؤن کے باعث تاج محل بھی ویران ہو گیا تھا اور ملکی و غیر ملکی سیاحوں سمیت کسی کو بھی تاج محل کی سیر کرنے کی اجازت نہیں تھی۔
 

تاج محل ملکی اور غیر ملکی سیاحوں کے لیے بھارت کا مشہور سیاحتی مقام ہے۔ اعداد و شمار کے مطابق سالانہ 70 لاکھ سیاح تاج محل کی سیر کرتے ہیں۔
 

حکام کا کہنا ہے کہ ایک دن میں صرف پانچ ہزار افراد کو سماجی دوری سے متعلق قواعد پر سختی سے عمل کرتے ہوئے تاج محل کے دورے کی اجازت دی جائے گی جب کہ ٹکٹس بھی صرف آن لائن خریدے جاسکیں گے۔

تاج محل مغل بادشاہ شاہ جہاں نے اپنی اہلیہ ممتاز محل کی یاد میں 17 ویں صدی میں تعمیر کرایا تھا۔

 

بیالیس ایکڑ رقبے پر پھیلی اس پرشکوہ عمارت میں ایک مسجد اور ایک مہمان خانہ ہے۔ سنگِ مرمر سے بنے مینار دُور سے ہی دلفریب منظر پیش کرتے ہیں۔
 

دنیا بھر سے لاکھوں سیاح یہاں کا رُخ کرتے ہیں۔ 1983 میں اقوامِ متحدہ کے ادارے یونیسکو نے اسے عالمی ورثہ قرار دیا تھا۔

عمارت کو دوبارہ سیاحوں کے لیے کھولنے سے قبل انتظامیہ نے مختلف مقامات کو جراثیم کش اسپرے سے صاف کیا۔