برازیل میں نئی حکومت کے خلاف مظاہرے، سرکاری عمارتوں پر دھاوا

برازیل کے سابق صدر جائر بولسونارو کے حامیوں نے اتوار کو حکومت مخالف احتجاج کرتے ہوئے کانگریس، سپریم کورٹ اور صدارتی محل پر دھاوا بول دیا۔ ہزاروں مظاہرین نے سرکاری عمارتوں کا گھیراؤ کیا اور توڑ پھوڑ بھی کی۔ پولیس نے مظاہرین کو منتشر کرنے کے لیے آنسو گیس کا استعمال کیا۔ مظاہرین نے نو منتخب صدر لویز اناسیو لولا ڈیسلوا سے استعفے کا مطالبہ کیا ہے۔ برازیل کے وزیرِ انصاف فلاویو ڈینو کے مطابق پولیس نے 200 افراد کو حراست میں لیا ہے۔ برازیل کے صدر لویز اناسیو لولا ڈیسلوا نے اکتوبر میں بولسونارو کو صدارتی انتخابات میں شکست دے کر ایک بار پھر صدارت کا عہدہ حاصل کیا تھا لیکن بولسونارو کے حامیوں نے انتخابی نتائج تسلیم کرنے سے انکار کر دیا تھا۔