امریکی ریاست فلوریڈا کے شہر میامی میں منہدم ہونے والی عمارت سے بدھ کو مزید چھ افراد کی لاشیں نکالی گئی ہیں جس کے بعد ہلاکتوں کی تعداد 18 تک پہنچ گئی ہے۔ درجنوں افراد کے ملبے تلے دبے ہونے کا خدشہ ظاہر کیا جا رہا ہے جن کی تلاش کے لیے ریسکیو کا کام ساتویں روز بھی جاری ہے۔
فلوریڈا: منہدم عمارت کے ملبے میں لوگوں کی تلاش جاری
1
میامی کے ساحل کے قریب سرف سائیڈ ٹاؤن میں واقع اس 12 منزلہ رہائشی عمارت کا ایک بڑا حصہ 24 جون کو اچانک زمین بوس ہو گیا تھا۔ عمارت منہدم ہوئے تقریباً ایک ہفتہ ہو گیا ہے۔
2
ملبے سے اب تک کسی شخص کو زندہ نہیں نکالا جا سکا ہے۔ ریسکیو اہلکار ساتویں دن تک صرف 18 افراد کی لاشیں ڈھونڈنے میں کامیاب ہوئے ہیں۔
3
ہلاک ہونے والوں میں دو بچے بھی شامل ہیں جن کی عمریں چار اور دس برس ہیں۔
4
میامی ڈیڈ کاؤنٹی کی میئر ڈینیئلا لیوین کاوا نے حادثے میں بچوں کی ہلاکت کو بھاری نقصان قرار دیتے ہوئے کہا ہے کہ ہماری کمیونٹی، امریکی قوم اور دنیا ان خاندانوں کے دکھ میں برابر کی شریک ہے جنہوں نے اس حادثے میں اپنے پیاروں کو کھو دیا۔